Бас қалада тағы бір үлкен жарыс өтеді
29 қарашада Астанада еркін және грек-рим күресінен Wrestling Stars халықаралық турнирі ұйымдастырылады, деп хабарлайды Halyq Uni.
Olympic.kz мәліметінше, сайыстың басты жұлдызы еркін күрестен екі дүркін әлем чемпионы, төрт дүркін Еуропа чемпионы, Рио Олимпиадасының қола жүлдегері Франк Чамисо (Италия) болмақ.
Елордалық бозкілемге еркін күрестен Азия чемпиондары Данияр Қайсанов пен Санжар Досжанов шығады. Сонымен қатар, жарысқа үш дүркін Азия чемпионы, әлем чемпионатының қола жүлдегері Азамат Дәулетбеков (еркін күрес), еркін күрестен Ресей чемпионы Алан Багаев, жастар арасындағы әлем чемпионатының жеңімпазы Исхар Кұрбаев (грек-рим күресі), грек-рим күресінен әлем чемпионатының күміс жүлдегері Қорлан Жақанша, U23 әлем чемпионатының алтын жүлдегерлері – еркін күрестен Начын Куулар әрі Ұлықбек Жолдошбеков (Қырғызстан) қатысады, – делінген ақпаратта.
Халықаралық турнир Beeline Arena кешенінде өтеді.