Бас қалада тағы бір маңызды жарыс ұйымдастырылады
Астана қаласында 10-12 қазан күндері «Қазанат» атшабарында Республика күніне және Қазақстан мәслихаттарының құрылғанына 30 жыл толуына орай Ұлттық ат спорты фестивалі аясында бәйге жарыстары және көкпардан ересектер арасында Солтүстік аймақтың шабандоздарына арналған республикалық турнир өтеді, деп хабарлайды Halyq Uni.
Жергілікті әкімдік мәліметінше, Ұлттық спортты дамыту арқылы салауатты өмір салтын насихаттау және көкпардан үздік спортшыларды анықтау мақсатында өтетін турнирге бүгінгі күнге дейін 7 команда тіркелді.
Көкпарға қазіргі таңда бас аяғы 7 команда тіркелді. Атап айтқанда, Қарағандыдан 2 команда тіркелсе. Астана мен Ақмола, Павлодар, Қостанай және Солтүстік Қазақстан облыстарынан бір команда тіркелді. Тіркелу әлі де жалғасып жатыр. Турнир бағдарламасына сәйкес, 10 қазан күні, турнирдің алғашқы күні көкпаршылар, шабандоздар, атбегілер келіп орналасып, мандат комиссиясы мен төрешілер алқасының отырысы, жеребе тарту, жарыс аттарын алаңмен таныстыру іс-шаралары өтеді. Жалпы 11 қазан күні көкпардан топтық ойындар басталады. Ал 12 қазан күні көкпардан финалдық ойындар ұйымдастырылады. Көкпар ойынында жүлделі алты орын болады. Көкпар турнирінің жалпы жүлде қоры – 12 000 000 теңгені құрайды», – деді жарыстың бас төрешісі Ерлан Канапин.
Сондай-ақ, фестиваль аясында бәйге түрлерінен сайыстар өтеді. Яғни, бәйге түрлері: құнан бәйге, жорға жарыс, топ бәйге, аламан бәйге ұйымдастырылады.
«Жалпы бәйге бойынша бүгінде онлайн түрде 8 ат тіркелді. Оның ішінде «Аламан» бәйгеге – 5 ат, құнанға – 3 ат. Бәйге жарыстарының жалпы жүлде қоры – 20 000 000 теңге. Соның ішінде тек аламан бәйге 5 орынға дейін жеңімпаздарды анықтайды. Қалған бәйге түрлері 3 орын ғана», – деді Астана қаласы бойынша «Бәйге» федерациясының төрешісі Гүлнәр Базарханова.
Көпшілік көз тіккен жүйріктер додасының ашылу салтанаты 12 қазан күні сағат 11.00-де басталады. Көрермендер үшін ұлттық ат спорты фестиваліне кіру тегін. «Қазанат» атшабарына №303, 309 және 323 автобустар қатынайды.