Еліміздегі жетімдер және ата-ананың қамқорлығынсыз қалған 3 мыңнан астам бала арнайы орталықтарда тәрбиеленіп жатыр, деп хабарлайды Halyq Uni.

Бұл балақайлардың жазғы демалысы қалай ұйымдастырылғанын білу мақсатында өңір әкімдіктеріне сауал жолдадық. Белгілі болғандай, тәрбиеленушілердің басым бөлігі жазғы лагерьлерде демалып, түрлі тақырыптағы үйірмелерге қатысып жатыр.

Мәселен, Абай облысында 138 тәрбиеленуші қала сыртындағы жазғы лагерьде демалып, 45 бала туризм, экология, спорт және басқадай  үйірмелерге қатысып жүр. Бұдан бөлек тәрбиеленушілер жаз бойы тәрбиеленушілер Семей қаласындағы биология орталығындағы үйірмелерге және  қаладағы спорт, мәдениет іс шараларына қатысады.

Ақмола облысында балаларға «Балдәурен» республикалық оқу-сауықтыру орталығына жолдама бөлінеді.

Сондай-ақ, Ақкөл қаласының орталығының балансында «Рассвет» балалар сауықтыру орталығы бар. Жыл сайын жаз бойы тәрбиеленушілер жазғы уақытта БСО-ға демалуға барады. Орталықтардың тәрбиеленушілері қосымша біліммен қамтылғанын, яғни, ұйымнан тыс үйірмелер мен секцияларға қатысады, – делінген редакцияға берілген ресми жауапта.

Алматы қаласындағы жетім және ата-анасының қамқорлығынсыз қалған балалар «Өрнек» лагерінде, сондай-ақ, демеушілердің көмегімен Алакөл көлінде, «Юный домостроитель», «Подгорный» спорттық-туристік лагерлерінде өткізіп жатыр. Бұған қоса оларға дебаттық клубтар мен үйірмелерге және спорттық секцияларға тарту, тарихи орындарға саяхаттар ұйымдастыру көзделген.

Шымкенттегі жеткіншектер демалысын биылғы жылдың 10 маусымы мен 28 тамызы аралығында «Үш бұлақ» жазғы сауықтыру лагерінде өткізіп жатыр. Лагерьде аптасына бір рет «Футбол», «Баскетбол», «Робототехника», «Күрес» және «Бокс» үйірмелері мен секциялары жұмыс істейді.

Батыс Қазақстан облысының тәрбиеленушілері 5 маусым – 25 тамыз аралығында  балалар ауылы жанындағы «Балдырған» жазғы лагерінде болады. Олардың рухани және мәдени танымдық білімдерін арттыру мақсатында қаланың көрікті жерлеріне, ойын сауық кешендеріне, кітапхана, мұражайларға т.б. орындарға саяхат ұйымдастырылады.

5 тәрбиеленуші «Евразия» туристік сауықтыру кешенінде, 2 бала Щучинск қаласындағы «Балдаурен»  республикалық  оқу сауықтыру орталығында, 5 бала «Қайсар» шатырлы лагерінде демалып қайтты. Алдағы уақытта «Шалқар» көлі жанындағы лагеріне 32 баланы, «Ақжайық қырандары» лагеріне 5 баланы, «Дарын» лагеріне 7 баланы, «Шұғыла» лагеріне 10 баланы, Астана  қаласына  танымдық экскурсияға 10 баланы демалуға жіберу жоспарланып отыр, – дейді облыстық білім басқармасы.

Ал Атырау облысы 38 тәрбиеленушіні 2-18-маусым аралығында Железноводск қаласындағы «Қазақстан геологы» сауықтыру лагеріне жіберді.  

Алматы облысы болса, 2-20 маусым аралығы күндері Алматыдағы ойын-сауық орталықтарына 162 баладан тұратын 13 топқа серуен ұйымдастырған. Сонымен қатар 3-23 маусым аралығында 10 баладан тұратын топ Алматы қаласындағы «Бөбек» жаздық демалыс лагеріне және 19-25 маусым аралығында 40 баладан тұратын 2 топ «Жас құрылысшы» лагеріне жіберілген. Бұдан бөлек 79 бала Медеу шатқалындағы «Горельник» демалыс орнына, Шонжы ауылындағы «Ыстық су», Талғар ауданындағы «Park Resort 8 көл» демалыс орталықтарында демалған.

Сонымен қатар, алдағы уақытта шілде, тамыз айларында 42 тәрбиеленуші балаларды «Горное солнце», «Спутник»,  «ALEM FIGHTERS» , «Жас құрылысшы» жаздық лагерлеріне демалысқа жіберу жоспарланған, – дейді әкімдік. 

Айта кетейік, балалар үшін бокс, таэквандо, баскетбол, дзюдо, компьютерлік сауаттылық, көңілді ағаш бұйымдары үйірмелері бар. Қазіргі таңда бұл үйірмелерге жалпы саны 107 бала қатысады. 

Қызылорда облысының балалары «Қамбаш» және  «Арай Sunrise» демалыс орындарында демалған. Сондай-ақ балдырғандар Алматы қаласына «Көлсай-Қайыңды-Шарын» бағыты бойынша турға саяхатқа барып қайтты. Одан бөлек Бурабайдағы   «EL UMITI-2023» жазғы білім беру лагерінде әлеуметтік дағдыларды қалыптастыруға бағытталған бағдарламаға сәйкес демалды. 15 бала елорданың 25 жылдығы аясында Астанаға келіп, көрікті жерлерін аралаған.

Қостанай облысының жеткіншектеріне генерал Бәкіров атындағы демалыс базасы, «Лесная сказка» қала сыртындағы лагеріне жолдама берді. Өңірдегі Жітіқара ауданының өмірлік қиын жағдайдағы балаларды қолдау орталығы өз қаражаты есебінен тәрбиеленушілерге «Солнечный» балалар сауықтыру лагеріне жолдама сатып алған.

Маңғыстау облысындағы 7-13 жас аралығындағы балалар ауылының тәрбиеленушілері 2 ай  Шымкент қаласындағы «Машат» жазғы сауықтыру лагерінде  демалады, 6 тәрбиеленуші «Жасыл ел» бағдарламасымен жұмыс істеп жатыр.

«Балалар ауылында  қолөнер (құрақ құрау, бисермен, тоқыма), таэквондо, үстел теннисі , армрестлинг, тоғызқұмалақ, асық ату сияқты  спорттық үйірмелерімен, бассейнмен толық қамтылған, – деп жауап берді әкімдік.

Павлодар облысы білім басқармасының мәліметінше, білім беру ұйымының барлық тәрбиеленушілері жазғы демалыспен қамтылған. Өңірдегі балалар үйлерінің тәрбиеленушілері Ақмола және Солтүстік Қазақстан облыстарындағы «Эдельвейс», «Самрұқ», «Арман», «Чайка», «Лесная сказка», «Балдәурен» қала сыртындағы лагерьлерде екі айға демалысқа жіберілген.

Шығыс Қазақстан облысындағы жетім балалар мен ата-анасының қамқорлығынсыз қалған балалардың барлығы  қала сыртындағы лагерьлерге барады деп жоспарланған. Лагерьден бөлек, мұражай, кинотеатр, театрларға барады.

Ақтөбе облысының тәрбиеленушілері жазғы демалыста облыстағы «Күншуақ» балаларды сауықтыру лагерінде демалады. «Күншуақ» балаларды сауықтыру лагерінде қолөнер, музыка үйірмелері және спорт секциялары жұмыс істейді.  

Жетісу облысындағы тәрбиеленушілер жазғы демалысын Ескелді ауданындағы «Айналайын» лагерінде өткізеді.

Бекітілген жоспарларға сәйкес, көрмелер, спорттық ойындар, ер балалар мен қыз балалар арасындағы әдеп, салт-дәстүрге негізделген байқаулар, поэзиялық кештер, әдеби викториналар, түрлі мастер-класстар, мотивациялық тренингтар, интеллектуалды ойындар, пікір-сайыстар, концертік және би кештері ұйымдастырылады, – дейді әкімдік.

Бұдан бөлек, олар Алакөл мен Балқаш көлінде демалады. Елорданың 25 жылдығы аясында 5 тәрбиеленуші Астанаға келді.