Украина президенті Владимир Зеленский қазір елдің жедел түрде НАТО-ға қосылуға өтініш беріп жатқанын айтты, деп хабарлады ВВС.

Зеленский Финляндия мен Швецияның одаққа тез қосылуын алға тартқанмен, НАТО-ның бас хатшысы Йенс Столтенберг альянсқа жаңа мүшелерді қабылдау барлық 30 одақтастың келісімімен жүзеге асатынын түсіндірді.

Біз НАТО-ға жол тарттық. Іс жүзінде альянс стандарттарымен өзара үйлесімділікті қазірдің өзінде дәлелдедік. Олар Украина үшін ұрыс даласында және өзара іс-қимылымыздың барлық аспектілерінде шынайы, - деді Украина президенті.

Сондай-ақ ол Украинаның Ресейге әрқашан тең, адал, лайықты және әділ шарттарда бірге өмір сүру туралы келісімге келуді ұсынғанын айтты.

Әрине, ресейлік президентпен бұл мүмкін емес. Ол абырой мен адалдықтың не екенін білмейді. Сондықтан біз Ресеймен диалогқа басқа президентімен келуге дайынбыз, - деді Владимир Зеленский.

Бұдан бөлек, Украина президенті өз мемлекетінің бүкіл аумағы жаудан азат етілетінін баса айтты.

Ал НАТО-ның бас хатшысы Столтенберг «Украинаның НАТО-ға кіру мәселесін қарауды тездету мүмкін бе?» деген сұраққа барлық елдердің мүшелікке өтініш беруге құқылы екенін айтып жауап берді.

Мүшелік туралы шешімді, әрине, барлық 30 одақтас ел қабылдауы керек және бұл шешімдерді біз консенсуспен ақылдасамыз. Қазір біз Украинаның жауыздықты жеңуіне көмектесу үшін тікелей қолдауға дайынбыз, - деді бас хатшы.

Сонымен қатар, АҚШ президентінің Ұлттық қауіпсіздік кеңесі де Украинаның НАТО-ға қатысу өтінішін басқа уақытта қарастырған дұрыс деп мәлімдеді.