Қоғам белсендісі Санжар Боқаев Namys деген атаумен жаңа саяси партия құратынын мәлімдеді. Сондай-ақ партия құрудағы мақсатын түсіндірді.

«Партия құруыдағы негізгі себептің бірі - үкіметтің әлсіз жұмысы мен сыбайлас жемқорлық. Біз үміттеніп, күте-күте шаршадық. Мемлекет естіген болады. Мысалы, Өзбекстан үкіметіне президенттің тиісті тапсырмасынан кейін ауыл шаруашылығы техникасына баж салығын алып тастау үшін бар болғаны үш-ақ күн қажет болды. Біздің үкімет 1,5 айдан бері кәдеге жарату алымын шеше алмады, тек блог-турлармен айналысып жатыр. Лобби мемлекеттен мықты екенін тағы да көрсетті. Сондықтан қоғамға өз партиясы керек», - деді ол.

Белсендінің айтуынша, партияның мақсаты әділеттілік орнайтын, адал және парасатты адамдар билік ететін мүлдем жаңа Қазақстан құру. Сондай-ақ ол ұйымның неліктен «Намыс» деп аталатынын түсіндірді.

«Namys - қазіргі заманғы және алға ұмтылған қазақстандық жастардан құралатын цифрлық саяси партия. Партияның басты құндылығы - адам, ал миссиясы адамдар үшін қолайлы мемлекет құру», - деді Санжар Боқаев.

Партия бағдарламасы 7 бағыттан тұрады:

• Әділ, тәуелсіз, адал сот жүйесін құру;
• Жемқорлыққа ымырасыз күрес жариялау;
• Мемлекетті, қоғамды, жастарды дамыту үшін мәдени революция жариялау;
• Толық саяси трансформация жүргізу (әділ, тәуелсіз сайлау жүйесін құру, жаңа партияларды тіркеу, өзін өзі ұсыну құқығын қайтару, парламент сайлауын өткізу, қала әкімдерін сайлау);
• Мемлекеттік аппарат санын қысқартып, тиімділігін арттыру;
• Сапалы біліммен, медицинамен қамтамасыз ету;
• Жастарға арналған зауыттар (жұмыс орындарын) ашу;

Қоғам белсендісі партия төрағасы сайлау арқылы таңдалатынын, тіркеліп, парламентке өтіп жатса, бюджет есебінен қаржыландырудан бас тартатынын мәлім етті. Сондай-ақ кәсіпкерлерден де қаржы алу ойында жоқ екенін жеткізіп, партия оның мүшелерінің жарнасы негізінде өзін-өзі қаржыландыратынын айтты.