Әлеуметтік желіде Алматы облысы Полиция департаменті бастығының тергеу жұмыстары жөніндегі орынбасары Рустам Әбдірахманов алтыншы сынып оқушысын қағып кеткен сәттен видео жариялады. 

Облыстық полиция департаментінің мәліметінше, оқиға 19 қыркүйекте сағат 18:45 шамасында болған. 

«Тoyota Camry автокөлігінің 24 жастағы жүргізушісі Жаңалық ауылында Жетіген-Алматы автожолының бойында жаяу жүргіншілер өткелінде 10 жасар баланы қағып кеткен. Алған жарақаттарының салдарынан бала оқиға орнында мерт болды», – деді Рустам Әбдірахманов.

Құқық қорғаушылар ҚР ҚК 345-бабының 3-бөлігі бойынша қылмыстық іс қозғады. 

Сотқа дейінгі тергеу Алматы облысы ПД анықтау бөліміне жүктелді.  Жүргуші ұсталып, Талғар аудандық полиция басқармасының уақытша ұстау изоляторына қамалған. Тиісті сараптамалар тағайындалды, - деді Әбдірахманов.

Айта кетейік, бұған дейін Алматы облысында 10 жасар баланы қағып кеткен көлік жүргізушісінің кім екені анықталғанын хабарлаған болатынбыз.