Атырау облысында (мектеп, 2 отбасылық дәрігерлік амбулатория, спорттық-сауықтыру кешені) құрылысына бөлінген аса ірі мөлшерінде бюджет қаражатын жымқыру дерегімен «Атырау облысы құрылыс басқармасы» мемлекеттік мекемесінің лауазымды тұлғалары мен «Техника-Рем строй» ЖШС-ның басшысына қатысты сотқа дейінгі тергеу жүріп жатыр.

ЖШС басшысына қатысты күзетпен ұстау туралы бұлтартпау шарасы қолданылды.

10 ақпанда қылмыстық іс шеңберінде Атырау облысы құрылыс басқармасы басшысының бұрынғы орынбасары (қазіргі таңда Атырау облысы Денсаулық сақтау басқармасы басшысының орынбасары) Қылмыстық-процестік кодекстің 128-бабына сәйкес ұсталып, Атырау қаласы Полиция басқармасының уақытша ұстау изоляторына қамалды.

Сотқа дейінгі тергеу жүргізілуде, өзге ақпарат Қылмыстық-процестік кодекстің 201-бабына сәйкес жариялануға жатпайды.

Атырау облыстық денсаулық сақтау басқармасы басшысының қаржы мәселелері жөніндегі орынбасары Нұрқуат Нудин сенiп тапсырылған бөтен мүлiктi иемденiп алу немесе талан-таражға салу дерегі бойынша күдікке ілінді. Оның үстінен ҚР Қылмыстық кодексінің 189-бабы бойынша қылмыстық іс қозғалғаны жайлы бұған дейін хабарланды. 

Нұрқуат Нудин денсаулық сақтау басқармасына басшы орынбасары лауазымына былтыр 1 сәуірде тағайындалған. Ал, құрылыс басқармасы басшысының орынбасары лауазымында 2019 сәуір —2021 наурыз аралығында қызмет еткен.