Павлодар облысында сілеусін мен елікті заңсыз аулаған деструктивті діни ағым өкілдеріне сот үкімі шықты, деп хабарлайды Polisia.kz.

Қылмыс биыл 2 қаңтарда Баянауыл ауданы Қызылтау ауылдық округінің аумағында жасалған. Күдіктілер сирек кездесетін жануарларды заңсыз аулағаны үшін ұсталды. Олардан 2 сілеусін терісі мен елік еті тәркіленген.

Тергеу барысында күдіктілердің псевдосалафизм өкілдері екені анықталды.

Баянауыл аудандық сотының үкімімен Павлодар қаласының 2 тұрғыны Қылмыстық кодекстің 337-бабы 4-бөлігі 2 және 4-тармақтары бойынша кінәлі деп танылды. Олар 6 жыл аң аулау құқығынан айырылып, 3 жылға бас бостандығынан айырылды әрі мылтықтары тәркіленді, - деп жазылған хабарламада.

Сондай-ақ сотталушылар мемлекетке 21 млн теңге көлеміндегі залалды төлеуге міндетті.