Матч бүгін елорда уақытымен түнгі сағат 01.00-де басталады
Бүгін Шотландияның Глазго қаласында Дэвис кубогының топтық турнирі басталып, Қазақстан құрамасы Нидерланды командасымен кездеседі.
Қазақстан мен Нидерландыдан басқа «D» тобында АҚШ пен Ұлыбритания құрамалары өнер көрсетеді. Плей-офф кезеңіне үздік екі команда жолдама алады.
Қазақстан – Нидерланды матчында алғашқы болып командалардың екінші ракеткалары Михаил Кукушкин (221 АТР) мен Таллон Грикспур (48 АТР) кортқа шығады. Бұл екеуі бұрын бір-бірімен ойнамаған.
Содан кейін қос құраманың үздіктері Александр Бублик (44 АТР) пен Ботик ван де Зандсхулп (35 АТР) кездеседі. Олар да бір-бірімен кортта кездеспеген.
Үшінші ойында, өзгеріс болмаса, Андрей Голубев – Александр Недовесов жұбы Матве Мидделкоп – Уэсли Колхофпен күш сынасады.
Матч бүгін елорда уақытымен түнгі сағат 01.00-де басталады. Алғашқы екі кездесуді «Qazsport» телеарнасының сайтынан көруге болады. Үшіншісі тікелей эфирден көрсетіледі.