Түркістан облысында да орман өртенді
Орман алқабының шамамен 10 га жуық жері отқа оранды
![](https://halyq-uni.kz/cache/imagine/1200/uploads/news/2022/09/04/63145b685d55a853400384.jpg)
Түркістан облысында орман тоғай алқабынан шыққан өрт сөндірілді. Бұл туралы облыс әкімдігінің баспасөз қызметі хабарлады.
Әкімдік өкілдерінің мәліметінше, 3 қыркүйекте сағат 12 сағат 52 минут шамасында Отырар ауданы, Көксарай ауыл округі, Шеңгелді ауылы тұсында орман тоғай алқабының жануы бойынша Өрт сөндіру бөлімінің №101 номеріне хабарлама түсті.
Оқиға орнына «Сырдария-Түркістан» орман шаруашылығы мекемесінен 35 адам, 2 өрт сөндіру автокөлігі, Өрт сөндіру бөлімінен 30 адам 2 өрт сөндіру техникасы мен 1 нива, Полиция бөлімінен 2 адам, 1 техника, ауыл округі әкімшілігінен 5 адам 1 арнайы техника жұмылдырылып, өрттің беті сағат 17.40 шамасында қайтты, сағат 21.43 шамасында өрт толығымен өшірілді, – делінген хабарламада.
Орман алқабының шамамен 10 га жуық жері өртенген. Адам шығыны болған жоқ.
Қазір «Сырдария-Түркістан» орман шаруашылығы мекесінің 4 техникасы мен 35 адам өрт жанған алқапқа бақылау жұмыстарын жүргізу үшін кезекшілік ұйымдастырып жатыр.