Индустрия және инфрақұрылымдық даму министрлігі жуырда жариялаған есеп бойынша, биылғы маусым-шілде аралығы мен былтырғы және биылғы шілде айлары аралығында баға өсімі қатты байқалған.

Жылдық мәнде қарасақ, жаңа пәтерлер өңірлер бойынша Ақтөбеде 32,5%, елордада 27,6%, Өскеменде 26,1% қымбаттаған. Ал қайта сату нарығында Қызылордада 44%, Өскеменде 43,7%, Талдықорғанда 43,4%, елордада 41,3% өскен. Тұрғын үйді жалға алу нарығында – Алматы қаласында 47,2%-ға шарықтаған.

Ал маусым-шілде айларында қайта сатылған пәтерлер 0,8%, жаңалары 0,5% қымбаттаған. Мұнда өзгеріс қатты байқалмайды.

МЕГАПОЛИСТЕРДЕ ПӘТЕР ҚАНША ТҰРАДЫ?

Мамандардың айтуынша, мамыр мен тамыз айлары аралығындағы сауда-саттықтың азаюы қалыпты жағдай. Сауда құлайды, себебі жұрт еңбек демалысына кетеді. Ал бағаға келер болсақ, Қазақстан құрылысшылар қауымдастығы мынадай мәлімет ұсынады.

Құрылыс материалдарының ішінде бетон ғана 3,3% қымбаттаған. Арматура, битум, цементтер де бағасын болмашы ғана өсірген.

«7-20-25» БІТСЕ ҚАРАПАЙЫМ АЗАМАТТАРҒА АУЫР ТИЕДІ

Қауымдастық президенті Виктор Микрюковтың айтуынша, баспана құнына тек құрылыс материалдарының бағасы әсер етеді деген сөз дәлелденіп отыр.

Кей сарапшысымақтардың зейнетақы қаражаты бағаға ықпал етті деген болжамы мүлде дәйексіз, негізі жоқ сөз екені көрінді. Өйткені зейнетақы шегі көтерілді, ол жақтан қаражат алу тоқтады. Алайда үй бағасы түскен жоқ, сұраныс төмендесе де баға сол қалпы сақталып тұр, дейді қауымдастық президенті Виктор Микрюков.

Оның сөзінше, «7-20-25» мемлекеттік бағдарламасында әлі 600 млрд теңгедей қаражат бар. Ол биыл емес, келер жылы біту керек. Ол бағдарлама аяқталған кезде алдымен қарапайым азаматтарға ауыр тиетінін айтады. Себебі, қаражаты бар деген азаматтар өзінің арасында қазіргідей бағамен үй сатып алатындары өте аз. Бірақ, биыл ондай қауіп жоқ екеніне сенімді.

Ал қыркүйектен бастап пәтер бағасы қалай өзгереді дегенге келсек, ол құрылыс материалдарының қымбаттауына байланысты болып тұр. Мамандар пәтер бағасы күрт қымбаттайды деп ойламайды. Ал құрылыс компаниялары клиент жоғалтпас үшін өз бетінше әдейілеп өсіруді жоспарлап отырған жоқ.

АЛМАТЫДА ҮЙ САЛАТЫН ЖЕР 6 МЛРД ТҰРАДЫ

Айта кетейік, өткен жолы Елорда мен Алматы қалаларының басшылығы инженерлік инфрақұрылым шамасы жетпейтіндіктен, жыл сайын елордада жаңадан салынатын үйлерді 2 млн ш.м.-ден, Алматыда 1,5 млн ш.м.-ден асырмауды ұсынған еді. Сарапшы бұл шешім нарыққа үлкен кері әсерін тигізетінін айтады.

Мысалы, Алматыда жер телімдері өте қымбат. Оны былай қойып, қабат санын шектеу шешімінің өзі қазірдің өзінде әл-Фарабиден жоғары жақтағы баспана құнын өсіріп отыр. Енді оған тағы құрылыс көлемін шектеу қосылса, жағдай тіпті қиындайды. Яғни, ұсыныс көлемі айтарлықтай азаяды да соған сай баға да өседі, дейді сарапшы.

Оның сөзінше, мұндай жағдайда құрылыс компаниялары да қысқаратыны сөзсіз. Қызметкерлерін де қысқартады. Нарықта ұсыныс азайған соң монополия күшейеді. Сондықтан нарықта тек өте қымбат жерді сатып ала алатындай үлкен қаражаты бар компаниялар ғана қалмақ.

Айталық, Алматыда құрылыс компанияларына ұнайтын жер телімдері көлеміне қарай шамамен 4-6 млрд теңге тұрады. Ол жерден пайда табу үшін үй бағасы одан бірнеше есе қымбат болуы керек, дейді ол.

Қауымдастықтың есебінше, баспананың әрбір мың шаршы метрі құрылысқа жұмылдырылған 40 адамның жұмыс орны дегенді білдіреді. Қазір құрылыс нарығында 800 мыңнан астам адам еңбек етіп жатыр. Ал осы айтылған шектеулер енгізілсе, шамамен 37 мың адам жұмыссыз қалайын деп тұр.