Жыл басынан бері елімізде 12,9 мың орынға 140 балабақша ашылды

2022 жылы «Білімді ұлт» сапалы білім беру» ұлттық жобасын іске асыру барысында елімізде 34 мың орынға 322 балабақша ашу жоспарланған. Бұл туралы Оқу-ағарту министрі Асхат Аймағамбетов Үкімет отырысында айтты.

Министр аталмыш жоба барысында балабақша, мектеп, колледж және қосымша білім беру деңгейлері бойынша 12 көрсеткіш пен 20 іс-шара атқару қарастырылғандығын атап өтті. Оның айтуынша, былтырға қойылған міндеттер толық атқарылып, іс-шаралар 100 пайыз орындалды.

Атап айтқанда, 2021 жылдың қорытындысы бойынша: 

• Мектепке дейінгі тәрбие мен оқытуда 47,1 мың орынға 534 жаңа балабақша ашылды. Нәтижесінде 2-6 жастағы балаларды қамту 88,4%-ды, 3-6 жастағы балаларды қамту 99%-ды құрады.
• Ерекше білімді қажет ететін балаларды психологиялық-педагогикалық қолдаумен қамтуды ұлғайту үшін 8 ПМПК және 6 түзету кабинеті, биыл тағы 3 ПМПК мен 4 түзету кабинеті ашылды. Нәтижесінде 175 мың мүмкіндігі шектеулі бала арнайы психологиялық-педагогикалық қолдаумен қамтылды.
• Білім беру сапасын арттыру мақсатында шағын қалаларда, аудан орталықтары мен ауылдарда 1015 мектеп жаңғыртылды.
• 949 мектепке жоспар бойынша 1825 пән кабинеті сатып алынды.

Бұған қоса министр жобаның биылға қойылған мақсаттары мен міндеттеріне назар аударды.

2022 жылы 34 мың орынға 322 балабақша ашу жоспарланған болса, 6 айдың қорытындысы бойынша 12,9 мың орынға 140 балабақша ашылды, – деді Асхат Аймағамбетов.

Сонымен бірге биыл 1003 ауылдық мектепті жаңғырту және 214 мың орынға 225 мектеп салу жоспарланғаны айтылды. Бұған қоса жыл басынан бері 22 мың орынға 49 мектеп пайдалануға берілгені белгілі болды.