Дүниеге келгеніне төрт-ақ ай болған Айша Өмірзақтың жүрегіндегі туа бітті ақауына ота жасалған соң, бірер күнде нәрестенің сол жақ беті қарайып, құлағы түсіп қалыпты. Шарасыз анасы сәбиінің осындай күйін көрген соң шырылдап жұрттан көмек сұрап отыр, деп хабарлайды  Информбюро.  

Перзентханадан бірден Түркістан облыстық балалар ауруханасына ауыр халде тасымалданған сәби аурудың үстіне ауру қосып алды деп ашынады анасы.

Перзентханадан шыға сала ауруханаға қайта түстік деген Айшаның анасы Мадина Әбдірова нәрестесі құрсағында жатқан кезде-ақ дәрігерлер жүрегінде ақауы барын айтыпты. Сондықтан түсік жасатуға кеңес берген екен. Бірақ анасы табандылық танытып, ақыры босануға бел буған. Айтуынша, 3 жарым келіден астам салмақта балпанақтай қызды дүниеге әкелген. Бірақ перзентханадан шыға ауруханаға жатқан. Дәрігерлер шарананың жүрегіне ауыр ота жасап, оны ойдағыдай өткерді. Алайда отадан соң дәрі құюда қателік кетті ме, әйтеуір, сол жақ беті қарайып, құлағы түсіп қалған деп күйінеді.

Бір күні құлағын ашып қарасам, қап-қара боп тұр. Тіпті, күйіп, жоқ болып кеткен. Ағаш құсап қалған ғой. Үгітіліп тұр. Жан жоқ. Мен: «мына қыздың құлағына не болған?» деп айқай салдым. Олар менің өзіме жауып жатыр. Жүректен дейді. Енді жүрекке системаларды құю үшін орталық катетер қояды екен. «Біз аман алып қалу үшін осылай істеуге мәжбүр болдық» дейді, – деді баланың анасы Мадина Әбдірова. 

Анасының айтуынша, қазір жансақтау бөлімінде жатқан Айшаның басы да күннен-күнге ісіп барады екен. Ауыр халдегі нәрестенің беті бері қарар емес. Сондықтан Алматы немесе Елордадағы дәрігерлерге қаратқысы келеді. Ал жергілікті ауруханадағы ақ халаттылар сегіз сағат тік тұрып, нәрестенің туа бітті ақауы бар жүрегіне күрделі ота жасағанымызбен сәбидің қан тамырлары жүйесіндегі ақау жағдайды ауырлатты деп отыр. Қан дұрыс тарамаған аумақ жансызданып қалған дейді ақ халаттылар.

Cамайы мен құлақ аймағының қараюы жүйелі тамырларының ақауы болғандықтан бұл спазмға және тромбо пайда болып, ол ишемияға алып келді. Содан бұл қарайып отыр. Бірақ  бұл жерге ешқандай катетер қойылған жоқ. Миға да ешқандай дәрі енгізілген жоқ. Сондықтан бұл күю емес, бұл ишемия. Ол жерде қанның жүрмеуі, – дейді Түркістан облыстық балалар ауруханасы бас дәрігерінің орынбасары Алмат Байсалов. 

Дәрігерлердің айтуынша, жүрек және қан тамырында ақауы бар науқастар сирек кездеседі екен. Сондықтан бұған қазақстандық мамандар былай тұрсын, тіпті израильдік дәрігерлермен теле медицина арқылы байланысып, науқасты о бастан бақылауымызға алғанбыз дейді.

Ал жасанды тыныс алу тетігімен жатқан нәрестені Алматы мен Елордаға тасымалдау мүмкін емес. Ауыр сырқаты бар сәбиге қолдан келген көмектен аянып қалып жатқан жоқпыз деп ағынан жарылды ақ халаттылар.