Жігіттің өмірін құртасың, қыздығың орнына келмейді деген
Заңгер әрі қоғам белсендісі Айгүл Орынбек өзінің Facebook-тегі парақшасында Жетісу облысындағы қайғылы жағдайға қатысты пікір білдірді, деп хабарлайды Halyq Uni тілшісі.
Оның айтуынша, біздің мемлекетті қауіпті елдің қатарына қосып қою керек.
«Қыз баласы көшеге шығып емін еркін жүре алмайтын жағдайға жеттік. Соңғы айда Шымкентте лифтіде балалы әйелге, көшеде қолына пышақ ұстаған жігіт қызға шабуылдағанына куә болдық. Ал күні кеше Алматыда екі жігіт қызды еркінен тыс мола жаққа алып барып зорламақшы болғанын да көрдік. Заң әділ жүрмейтін елде қылмыс осылай ашық жасалады. Себебі, қылмыскер өзінің жасаған қылмысы үшін ақша беріп құтылып кететінін біледі. Яғни өзінің жазаланбайтынын білген адам еркін қимылдайды.
Шымкентте көшеде пышақпен қорқытып зорламақшы болды деп арыз жазып барған қызға, полицейлер өзің кінәлісің,«қысқа шорти» киген деп өзіне айып таққан. Қаншама зорлық-зомбылық істерімен жүрмін, көбінесе зорлық көрген қыздарды кінәлап жатады. Он бес жасар қызды зорлаған қылмыскер одан алдын да қыз зорлап, үлгілі тәртібі үшін түрмеден босатылған екен. Тіпті екінші рет зорлаған қызға қамалып кетпес үшін үйленген деген ақпаратты оқып таңқалғаным жоқ. Себебі осының бәріне жол беретін біздің құзырлы органдар екенін де жақсы білем, практикамда кездескен», - дейді заңгер.
Айтуынша, әсіресе қыз арыз жазып барса, полиция қызметкерлері жігіттің өмірін құртасың екеуің қосыла салыңдар, қыздығың орнына келмейді дегендерді де өз көзіммен көрген.
«Қылмыскерде ұлт болмайды! Оның ұлтын айтып, өздеріңнің намыстарыңды оятпай ақ қойыңдар! Қылмыскерлерді тайраңдатып қоятын жүйені реформалауды анау ұйықтап отырған үкіметтен талап етіңдер. Өз жігітерімізде жетерлік қыздарымызды қорлап, зорлап жатқан! Тіпті аяғының астына салып теуіп жатқан. Иттердің құқығын қорғауды емес, ең бірінші әйел адамдардың құқығын қорғауды басты орынға қоятын уақыт келді!», - деп жазды ол.