Ақтөбедегі балабақшалардың бірінде тәрбиешілер баланы қараусыз қалдырған. Бұл туралы өңірлік коммуникациялар қызметінде өткен брифингте айтылды. Оқиға қай балабақшада болғаны әзірге белгісіз. 

Балабақшалардың бірінде бүлдіршін баспалдақтан құлап, мойнын жарақаттап алған. Ол кезде мұғалім қасында болған. Бала өзі дәретханаға барып, қанды жуып, әрі қарай ойынға айналып кеткен. Сөйтіп кешке дейін әке-шешесі келгенше жүре берген. Бұл үшін балабақша меңгерушісіне 150 мың теңге айыппұл салынды, - дейді Ақтөбе облысы бойынша білім беру саласындағы сапаны қамтамасыз ету департаментінің басшысы Гүлнар Сәрсенғалиева.

Оның айтуынша, соңғы аптаның өзінде ведомствоға төрт шағым түскен, оның үшеуі мектепке дейінгі ұйымдардың жұмысына қатысты екен. Облыста барлығы 559 мектепке дейінгі мекеме бар. Алайда олардың саны одан да көп болуы мүмкін, өйткені департамент өкілі барлық кәсіпкерлер балабақша ашу туралы хабарламайтынын атап өтті. Тиісінше, шенеуніктердің өздері де мойындағандай, балабақшада балаларды кім тәрбиелеп жатқаны, немен қамтамасыз етілгені, онда қандай жағдай жасалғаны туралы толық мәлімет жоқ.