Мәжит Шәріпов 4 шілдеде «Қазатомөнеркәсіп» ұлттық атом компаниясы» басшысы қызметінен кетеді. Бұл туралы ұлттық компанияның сайтында хабарланды.

«Қазатомөнеркәсіп» ұлттық атом компаниясы» АҚ Мәжит Бейсембайұлы Шәріпов компанияның басқарма төрағасы - директорлар кеңесінің мүшесі қызметінен 2022 жылдың 4 шілдесінен бастап өз еркімен кетеді.

Компанияның Директорлар кеңесі «Қазатомөнеркәсіп» басқарма төрағасы қызметіне кандидатураны іріктеу кезеңінде өндіріс жөніндегі бас директор Ержан Жанәбілұлы Мұқанов басқарма төрағасының міндетін атқарады.

Мәжит Шәріпов 1964 жылы Ақмола облысында дүниеге келген. МИФИ ҰЯЗУ Обнинск атом энергетикасы институтын бітірген.

Еңбек жолын 1988 жылы ҚазКСР Ғылым академиясының Ядролық физика институтында реактордың эксперименттік қондырғысын пайдалану қызметінің инженері болып бастаған.

1992-1999 жылдары – ҚР Атом энергиясы агенттігі Ядролық қауіпсіздік және физикалық қорғау бөлімінің маманы.

2000-2008 жылдары – ҚР Энергетика және минералдық ресурстар министрлігі Атом энергетикасы комитетінің инспекциялау және талдау бөлімі басқармасының басшысы; бөлім басшысы.

2008-2010 жылдары – ҚР Энергетика және минералдық ресурстар министрлігінің Ядролық энергетика және атом өнеркәсібі департаментінің директоры.

2010-2012 жылдары – ҚР Индустрия және жаңа технологиялар министрлігі атом энергетикасы және өнеркәсібі департаментінің директоры.

2012-2013 жылдары – ҚР Атом энергиясы агенттігі атом энергетикасы және өнеркәсібі департаментінің директоры.

2013-2014 жылдары – Қазақстан ИЖТМ Атом энергиясы комитетінің төрағасы.

2015-2020 жылдары «Қазатомөнеркәсіп» ҰАК» АҚ-да басшылық қызметтерде жұмыс істеді.

2021 жылғы қаңтардан бастап 2021 жылдың қыркүйегіне дейін «Қазатомөнеркәсіп» ҰАК» АҚ ядролық-отын циклы жөніндегі бас директоры болды.

2021 жылдың қыркүйегінен бастап «Қазатомөнеркәсіп» ұлттық атом компаниясы» басқарма төрғасы.