Бұл туралы Партия төрағасының бірінші орынбасары Бауыржан Байбек хабарлады.

Nur Otan партиясы саяси кеңесінің қаулысымен 2022 жылғы 28 қаңтарда партияның кезектен тыс XXI съезін өткізу туралы шешім қабылданды. Коронавирусқа байланысты шектеу шараларын ескере отырып, ол онлайн-форматта өтеді, – деп жазды твиттерде Бауыржан Байбек.

18 қаңтарда Қазақстанның Тұңғыш президенті Нұрсұлтан Назарбаев елдегі соңғы жағдайға байланысты мәлімдеме жасап, жақында Nur Otan партиясының төрағалығына Қасым-Жомарт Тоқаев сайланатынын айтты.

2021 жылғы қарашада Елбасының баспасөз хатшысы Айдос Үкібай Назарбаевтың Nur Otan партиясының төрағасы өкілеттігін Президентке тапсыру туралы шешімін түсіндірді.

Бүгінгі шешім – билік транзитінің қисынды жалғасы ғана. Нұрсұлтан Назарбаев атап өткендей, әсіресе қазіргі пандемиядан болып отырған жаһандық дағдарыс кезінде Nur Otan партиясы Қазақстан Президенті үшін басты тірек болуы керек. Жарғыға сәйкес, Nur Otan партиясының төрағасын сайлау мен оны лауазымынан босату партия съезінің ерекше құзыретіне жатады. Оған дейін Назарбаев партия төрағасының қызметінде болады, - делінген Айдос Үкібайдың пікірінде.