Бүгінде елордадағы жастар саны - 232 065. Оларға жан-жақты, соның ішінде тұрғын үй мәселесін шешу бойынша қолдау көрсетіліп келеді. Бұл туралы онлайн брифингте қалалық жастар саясаты мәселелері басқармасының басшысы Қайрат Қамбаров айтты, деп хабарлайды Нұр-Сұлтан әкімдігінің ресми сайты.

Бүгінде қаланың 15 жоғары оқу орнында 62 788 студент (бакалавриат, магистратура, докторантура) білім алып жүр.

Жұмыс істейтін жастар саны  – 133,2 мың.

Жұмыс істейтін жастарға арналған «Elorda zhastary» жеңілдікпен несие беру бағдарламасы бойынша өтінімдер қабылдау қазан айында басталған. Бүгінгі таңда 150 несие берілді, - деді спикер.

Естеріңізге сала кетейік, бағдарлама аясында жұмыс істейтін жастарға 18 млн теңгеге дейін жеңілдетілген несие беріледі.

Шарттар келесідей:

• Пайыздық мөлшерлеме – жылдық 5% ;
• Бастапқы жарна – 10%;
• Несие мерзімі – 25 жылға дейін.

Сондай-ақ 3 жылдан бері тоқтаусыз «Сатып алу құқығынсыз жұмыс істейтін жастар үшін жалға берілетін тұрғын үй» бағдарламасы іске асырылып жатыр.

Биыл бағдарлама бойынша тұрғын үй алуға 4 863 адам өтініш берген. Барлығы 1050 пәтер беріледі.

Іріктеу балдық жүйе бойынша, ал пәтерлерді бөлу өтініш берушілердің отбасы құрамы бойынша жүргізілді.