Мемлекет басшысының Жарлығымен Серік Мақашұлы Жұманғарин Қазақстан Республикасы премьер-министрінің орынбасары – Ұлттық экономика министрі болып тағайындалды, деп хабарлайды Halyq Uni Ақордаға сілтеме жасап.

Ол бұрынғы атқарған лауазымынан босатылды. Айта кетсек, биыл ақпан айында Серік Жұманғарин премьер-министрдің орынбасары болып қайта тағайындалған болатын.

Серік Жұманғарин 1969 жылы 22 шілдеде Ақтөбеде дүниеге келген. 1997 жылы Е.А. Бөкетов атындағы Қарағанды мемлекеттік университетін «Қаржы және несие» мамандығы бойынша бітірді. 2013 жылы Халықаралық бизнес академиясында «Менеджмент» мамандығы бойынша іскерлік әкімшілік магистрі дәрежесін алды.

• 1993-2004 жылдары кәсіпкерлік қызметпен айналысты;
• 2005-2006 жылдары Ақтөбе қаласының экономика және бюджеттік жоспарлау бөлімі бастығының орынбасары, Ақтөбе қаласы кәсіпкерлік бөлімінің бастығы;
• 2006-2007 жылдары Табиғи монополияларды реттеу агенттігінің Ақтөбе облысы бойынша басқармасы бастығының орынбасары;
• 2007-2008 жылдары Табиғи монополияларды реттеу агенттігі Ақтөбе облысы бойынша басқармасының бастығы, аталған агенттіктің Ақтөбе облысы бойынша департаментінің директоры;
• 2008-2010 жылдары Индустрия және сауда министрлігі Сауда комитеті төрағасының орынбасары, сауданы дамыту департаментінің директоры; «Қазақстандық келісім-шарт агенттігі» АҚ басқарма төрағасының орынбасары;
• 2010-2011 жылдары «NadLoc жергілікті қамтуды дамыту ұлттық агенттігі» АҚ басқарма төрағасының орынбасары, бірінші орынбасары;
• 2012-2013 жылдары Экономикалық даму және сауда министрлігі өңірлік саясат және бюджетаралық қатынастар департаментінің директоры; Экономикалық даму және сауда министрлігі Өңірлік даму комитетінің төрағасы;
• 2013 2014 жылдары Өңірлік даму вице-министрі;
• 2014-2017 жылдары Ұлттық экономика министрлігі Табиғи монополияларды реттеу және бәсекелестікті қорғау комитетінің төрағасы;
• 2019-2020 жылдары Бәсекелестік және монополияға қарсы реттеу жөніндегі Еуразиялық экономикалық комиссия алқасының мүшесі (министр);
• 2020 жылғы 14 қыркүйекте Бәсекелестікті қорғау және дамыту агенттігінің төрағасы қызметтерін атқарды.

2022 жылы қыркүйекте премьер-министрдің орынбасары – Сауда және интеграция министрі болып тағайындалды.

Ал мемлекет басшысының Жарлығымен Нұрлан Байбазаров премьер-министрдің орынбасары – Ұлттық экономика министрі лауазымынан босатылды. Ол аталған қызметке биыл ақпан айында ғана тағайындалған болатын.