Halyq Uni логотип
×

Ғылыми-педагогикалық сарапшылар базасына үміткерлерді қабылдау басталды

Конкурс төрт кезеңнен тұрады

 Динара Амантай 13.12.2024 | 21:11
Ғылыми-педагогикалық сарапшылар базасына үміткерлерді қабылдау басталды
Фото: Halyq Uni

Ғылыми-педагогикалық сараптама саласындағы сарапшылар базасына үміткерлерді қабылдау басталды, деп хабарлайды Halyq Uni.

Оқу-ағарту министрлігі ақпаратына сәйкес, республикалық ғылыми-тәжірибелік білім мазмұнын сараптау орталығы 17-30 желтоқсан аралығында оқу бағдарламалары, оқулықтар және оқу-әдістемелік кешендерді сараптау үшін мамандарды іріктеу конкурсын жариялайды. Қатысуға педагог-зерттеуші немесе одан жоғары біліктілігі бар кандидаттар шақырылады.

Сарапшылар базасына қабылдану үшін қажетті іс-шаралар:

  • E-EXPERT.GOV.KZ порталы арқылы қажетті құжаттар мен өтінішті тапсыру;
  • Тестілеу — кәсіби құзыреттерді тексеру кезеңдері;
  • Сұхбат — кәсіби тәжірибені, мотивациямен білім беру процесін түсінуді анықтау үшін жеке әңгімелесу;
  • Эссе жазу — ойды нақты әрі дәйекті түрде білдіру және өз пікірін дұрыс дәлелдеу дағдыларын көрсету.

Барлық кезеңдерден сәтті өткен үміткерлер оқудан өтеді. Курстардың ұзақтығы – 360 сағат. Бағдарлама оқу материалдарының сапасын бағалауға қатысты құзыреттерді дамытуға бағытталған. Оқу барысында үміткерлер сараптамалық шешім әзірлеу бойынша теориялық білім мен практикалық дағдыларды меңгереді, – делінген министрлік ақпаратында.

Оқуды аяқтағаннан кейін қатысушылар 5 жыл мерзімге жарамды сертификат алады. Сондай-ақ, қатысушылар білім беру материалдарын сараптауға әрі бағалауға белсене қатысып, кәсіби біліктілігін арттырады және мансаптық мүмкіндіктерін кеңейтеді.

Серіктес жаңалықтары

Сараптама