Қазақстан дәнді дақылдардың экспорттық нарығын кеңейтуді жоспарлап отыр,  деп хабарлайды Halyq Uni. 

Үкімет баспасөз қызметінің мәліметінше, Қазақстан жыл сайын 8-9 млн тонна астық экспорттайды, оның 6,5-7,5 млн тоннасы — бидай.

Экспорт географиясы 40-тан астам елді қамтиды. Орталық Азия, Ауғанстан, Қытай, Түркия, Иран, Италия, Тунис елдері дәстүрлі нарық саналады.

Биылғы қарашаның соңындағы жағдай бойынша 6,3 млн тонна астық экспортталды. Жаңа өнім экспорты — 2,37 млн тонна, бұл 2023 жылдың сәйкес кезеңімен салыстырғанда 52%-ға артық, — делінген хабарламада.

Өзбекстанға жеткізілім 42%-ға артып, 944 мың тоннаға жетті. Өткен жылы бұл көрсеткіш 665 мың тонна болған. 

Тәжікстанға жеткізілім 49%-ға өсіп, 2023 жылғы 254 мың тоннадан биыл 377 мың тоннаға дейін жетті.

Сондай-ақ Қытайға экспорт көлемі 17%-ға өсіп, өткен жылғы 304 мың тоннадан биыл 355 мың тоннаға дейін артқаны байқалды.

Ауғанстанға жеткізілімдер көлемі 71%-ға ұлғайып, өткен жылғы 67 мың тоннадан 115 мың тоннаға дейін артты.

Иранға экспорт көлемі 10 мың тоннадан 30 есеге артып, 299 мың тоннаға жетті.

Биыл экспорттық әлеует 12 млн тоннаға жетеді деп болжанып отыр. Негізгі өткізу нарықтары – Орталық Азия, Қытай, Ауғанстан, Италия және басқа елдер. Сондай-ақ Әзербайжан, Ауғанстан, Иран, Ирак, Солтүстік Африка және ЕО елдеріне Қара және Балтық теңіздерінің порттары арқылы 2 млн тоннаға дейінгі көлемде астық тасымалдау мәселесі пысықталып датыр, — делінген Үкімет хабарламасында.

Жұмыстың тиімділігін арттыру үшін Қазақстан ішінде де, экспортқа да жөнелтуді жоспарлайтын жедел астық штабы құрылды. Халықаралық дәліздер құру жөніндегі жобаларды іске асыру арқылы экспорт географиясын одан әрі кеңейту жоспарланып отыр.