Оралда қарашаның 20-сы мен 24-і аралығында өткен шорт-тректен ел Кубогі жарыстарында бірінші орынның барлығын дерлік жергілікті спортшылар иеленді, деп хабарлайды Halyq Uni.

Ерлер және әйелдер арасында өткен ел кубогі 4 күнге созылып, оған еліміздің 6 өңірінен 75 спортшы қатысты. Сырғанақ шеберлері 3 жекелей және 3 эстафеталық қашықтықта сынға түсті.

Бірнеше қашықтықта өткен жарыс қорытындысы бойынша БҚО спортшыларының мерейіс үстем болды. Айталық, 500 метр қашықтықта әйелдер арасында батысқазақстандық Гүлдана Жалмұханға ешкім тең келмеді. Ал ерлер арасында Қарағанды облысынан келген Равиль Маликов бәрінен озды. Өзге өңірлер спортылары арасынан бас бәйгені олжалаған осы Равиль ғана болды. Қалған бірінші орынның барлығы жергілікті конькишілер еншісінде қалды.

1000 метр қашықтықта да батысқазақстандық спортшыларға бәрінің алдына шықты. Гүлдана Жалмұхан мұнда да әйелдер арасында озып келсе, ерлер арасында Мадияр Мадихов доданың алдын бермеді.

1500 метр қашықтықтағы бәсекеде әйелдер арасында Набет Аэлита бәсекелестерінің алдын ораса, ерлер арасында Мақсат Уәлиолла осы жетістікті қайталады. Екеуі де БҚО-дан.

Эстафеталық жарыста да БҚО конькишілері ешкімді шақ келтірмеді. Әйелдер арасында 3000 метр қашықтықта өткен жарыста өңір спортшылары басқа командалардың алдын орап, бірінші орын олжалады.

Ерлер командасы да осы биіктен түспей, 5 шақырымдық жарыста ешкімге дес бермеді.

Сондай-ақ, 2000 метр аралықтағы аралас командалық жарыста да БҚО-лық конькишілер бірінші орынды иемденді.

Айта кетерлігі, бұл жарыстарда облыс құрамасының алды саналатын Абзал Әжіғалиев пен Нұртілек Қажығалиевтер қатысқан жоқ. Бұл күндері Нұртілек Италияның Бормио қаласында өткен Alta Valtellina Trophy халықаралық турнирінде бақ сынады. Онда ол 1000 метр қашықтықтағы жарыста жеңімпаз атанды. Нәтижесінде ұлттық құрама қоржынына екі алтын, бір күміс медаль түсті.