Сингапур төлқұжаты 91,27 ұпай жинап, 1-орынға шықты
Қазақстан төлқұжаты Орталық Азиядағы ең қуатты төлқұжат атанды, деп хабарлайды Halyq Uni Stan.kz-ке сілтеме жасап.
VisaGuide Passport Index 2024 төлқұжаттар рейтингінде Қазақстан Орталық Азиядағы ең күшті ел деп танылып, 106-орынды иеленді. Аймақтағы елдердің ішінде Қазақстан төлқұжаты Өзбекстан, Қырғызстан, Тәжікстан және Түрікменстан төлқұжаттарын басып озды.
Қазақстан төлқұжаты визасыз кіру мүмкіндігін, келу кезінде алынатын визаны, электрондық визаларды және жаһандық ұтқырлықтың басқа аспектілерін ескеретін баллдық жүйе – Destination Significance Score (DSS) бойынша 36,66 ұпай жинады.
Рейтинг бойынша Қазақстан азаматтары 47 елге визасыз бара алады, 30 ел алдын ала виза алуды талап етеді, ал тағы 30 ел келгеннен кейін виза алуға мүмкіндік береді.
Ал Өзбекстан төлқұжаты 125-орынды (27,62 ұпай), Қырғызстандікі 134-орынды (23,33 ұпай), Тәжікстандікі 141-орынды (21,76 ұпай), Түрікменстандікі 161-орынды (17,55 ұпай) иеленді.
Сингапур төлқұжаты 91,27 ұпай жинап, 1-орынға шықты. Сингапур азаматтары 160 елге визасыз бара алады. Үздік бестікке Испания, Италия, Франция және Венгрия кірді.
Рейтинг бойынша, әлемдегі ең әлсіз төлқұжат Сомали азаматтарына тиесілі.