Олжас Бектенов британдық SEFE компаниясы өкілімен орман климаттық жобасының басталуын талқылады, деп хабарлайды Halyq Uni.

Премьер-министр британдық SEFE Marketing&Trading Limited компаниясының активтерді басқару жөніндегі вице-президенті Александр Демидовпен және қазақстандық «SAFC» ЖШС директоры Юрий Киммен кездесу өткізді. Еліміздегі алғашқы орман климаттық жобасын іске асыру үлгісінде ынтымақтастық мәселелері талқыланды, деп мәлімдеді Үкімет.

Қазақстан президентінің қатысуымен 2023 жылғы желтоқсанда Дубайда өткен СОР 28 Дүниежүзілік климаттық саммиті аясында жасалған меморандум шеңберінде бүгін Астанада британдық компанияның 30 жыл бойы орман отырғызуға және көміртегі бірліктерін шығаруда инвестицияларын көздейтін SEFE Marketing & Trading Ltd. және «SAFC» ЖШС арасында келісімге қол қойылды, – деп қосты ведомство.

Жоба Алматы облысында 1500 га аумақта орман экожүйесін құруға бағытталған. Терек, қарағаш және ілеспе тұқымдарды (тораңғы, қайың, ерен ағашы, итмұрын, шырғанақ және басқалары) қоса алғанда, 3,3 млн ағаш отырғызу жоспарланып отыр. Іске асыру су үнемдеу технологиялары мен қарқынды агротехниканы пайдалана отырып жүзеге асырылады. Болжам бойынша, ластаушы заттардың шығарылуының орташа жылдық төмендеуі гектарына 26 тонна CO₂ құрайды. Небәрі 30 жыл ішінде 1,2 млн тонна көмірқышқыл газы жойылады, бұл гектарына 780 тонна CO₂-ға тең. Сонымен қатар, агроорман шаруашылығын дамыту, экотуризм және жұмыс орындарын ашу тұрғысынан тиімді нәтиже күтіліп отыр.

Премьер экологиялық тепе-теңдікті қамтамасыз ету бойынша бизнеспен бірлескен жұмыстың маңызына тоқталды.

Мемлекет басшысы Жолдауында экология, Қазақстанның табиғи байлығын сақтау және көбейту мәселелеріне ерекше көңіл бөлді. Ормандардың көбеюі біз үшін өте маңызды.  Біз экологиялық жобаларға шетелдік инвестицияларды тарту үшін қолайлы жағдай жасауға тырысамыз. Үкімет экожүйені қалпына келтіруге, көміртегі ізін азайтуға, жасыл экономиканы дамытуға және басқа да негізгі мәселелерге бағытталған жобаларды қолдайды, – деді Бектенов.

SEFE вице-президенті Александр Демидов пен «SAFC» ЖШС директоры Юрий Ким әңгімелесу барысында жобаның Қазақстан үшін ғана емес, бүкіл Орталық Азия өңірі үшін бірегейлігі мен маңызын атап өтті. Бастама – бизнестің, мемлекеттің және халықаралық әріптестердің тиімді өзара іс-қимылының үлгісі.