Қалада бұл ауруды 2,6 мыңнан аса адам жұқтырған
Жыл басынан бері елордада 327 адамнан АИТВ (ВИЧ) инфекциясы анықталды, деп хабарлайды Halyq Uni.
Қалалық АИТВ инфекциясының алдын алу орталығының мәліметінше, инфекцияны жұқтырғандардың 75,2%-ы ер адамдар, 24,8%-ы – әйелдер. Ауру анықталғандардың 62,4%-ы – 20-39 жаста.
Биыл 1 қазандағы ақпарат бойынша елордада жалпы АИТВ (адамның иммун тапшылығы вирусы) жұқтырған 2 688 адам тұрады.
Бүгін Астанада дүниежүзілік ЖИТС-ке (СПИД) қарсы күрес күніне орай АИТВ-инфекциясының алдын алу айлығы басталды. Негізгі мақсат – инфекция туралы ақпарат беру, АИТВ/ЖИТС мәселесіне халықтың назарын аударту.
Бір ай ішінде медицина қызметкерлерінің, белсенділердің, білім беру ұйымдарының, ведомстволық органдардың қатысуымен түрлі іс-шара өтеді. Сондай-ақ адам көп жиналатын орындарда (сауда ойын-сауық орталықтарында, базарларда, теміржол вокзалдарында, әуежайда және тағы басқа) АИТВ инфекциясын анықтауға тест тапсырып, маманнан ақыл-кеңес алуға болады, - деп жазылған хабарламада.