Skills Enbek-тегі кейбір ақылы курстар халықтың әлеуметтік осал топтары үшін ақысыз негізде қолжетімді болады, деп хабарлайды Halyq Uni.

«Еңбек ресурстарын дамыту орталығы» АҚ мәліметінше, Skills Enbek платформасында «Әлеуметтік» қосымшасы құрылған. Онда халықтың әлеуметтік осал топтарына жататын қазақстандықтарға кейбір ақылы курстар бойынша тегін негізде оқуға мүмкіндік беріледі.

Оқуды бастау үшін азаматтарға «Әлеуметтік» қосымшасындағы курсты таңдау кезінде ЭЦҚ арқылы олардың мәртебесінің сәйкестігін растау қажет. Тексеруден сәтті өткеннен кейін курс пайдаланушының жеке кабинетінде қолжетімді болады.

Қазір жаңа бөлімде киіз басу және тігу сияқты қолданбалы мамандықтар, сондай-ақ экологиялық және әлеуметтік білім беру дағдылары бойынша сурдоаудармасы бар бірнеше курстар бар. Бұл курстарды USAID қолдауымен «Инклюзивті қолөнер» жобасы аясында «Qolqanat Foundation» қоғамдық қоры әзірледі.

Еске сала кетсек, Skills Enbek платформасы – маркетплейс қағидаты бойынша курстарға қол жеткізуді қамтамасыз ететін халықаралық оқыту алаңдарының қазақстандық аналогы. Іске қосылғалы бері платформада әртүрлі бағыттар бойынша 600-ден астам курс орналастырылды. Олардың жартысы тегін негізде қолжетімді. Платформаға қазірдің өзінде 474 мыңнан астам адам тіркелген. Олардың 390 мыңнан астамы оқуды сәтті аяқтады.