Билетті сайттан сатып алуға болады
Биыл желтоқсанда Қарағанды – Мәскеу жолаушылар пойызы іске қосылады, деп хабарлайды Halyq Uni.
2024 жылғы 17 желтоқсаннан бастап Қарағанды – Мәскеу бағытында №83/84 халықаралық жолаушылар пойызы қатынайды. Ол аптасына 2 мәрте жүреді: Қарағандыдан сейсенбі және сенбі күндері, ал Мәскеуден кері бағытта жұма және сейсенбі күндері, - деп жазылған «Қазақстан темір жолы» ұлттық компаниясы таратқан хабарламада.
Пойыз Қарағанды, Астана, Көкшетау, Петропавл, Челябі, Уфа, Самара, Пенза және Мәскеу сынды ірі қалаларда тоқтайды. Онда купе және плацкарт вагондары, сондай-ақ мүмкіндігі шектеулі жолаушыларға арналған арнайы орындар бар.
Билеттерді жөнелтуге 45 күн қалғанда bilet.railways.kz сайтынан немесе вокзалдардағы «Жолаушылар тасымалы» АҚ кассаларынан сатып алуға болады.