Денсаулық сақтау министрлігі Қоғамдық кеңесінің кезекті отырысында Міндетті әлеуметтік сақтандыру қорының (МӘСҚ) осы жылдың 8 айындағы қызметі туралы есебі тыңдалды. Отырыста ситуациялық-талдау орталығы (СТО) мен Saqtandyru ақпараттық жүйесінің жұмысы жария етілді, деп хабарлайды Halyq Uni.

Қордың басқарма төрағасы Әбілқайыр Сқақовтың айтуынша, 5 бағыт бойынша жаңа тариф күшіне енген, қосымша 9 бағыт бойынша қайта қарау қыркүйек айында бітеді.

Денсаулық сақтау министрі Ақмарал Әлназарова медициналық қызметтерге тарифті жетілдіру және қаржыландыруды оңтайландыру бойынша міндеттерді үнемі қадағалауда ұстауды тапсырды. Министр, сонымен қатар, міндетті әлеуметтік медициналық сақтандыру жүйесін (МӘМС) жетілдіру бойынша үйлестіру кеңесін құру жөнінде сөз қозғады.

Қоғамдық кеңес төрағасы Надежда Петухова азаматтардың өз денсаулығы үшін ортақ жауапкершілік алу маңыздылығын айта келе сақтандырылмаған азаматтармен белсенді жұмыс жүргізуге назар аудартты.