Ертең Көшпенділер ойындары басталады
Дүниежүзілік көшпенділер ойындары қарсаңында Астанада «Көшпенділер әлемі» этноауылы ашылды, деп хабарлайды Halyq Uni.
Жергілікті әкімдік мәліметінше, бүгін «Қазанат» ипподромының жанында орналасқан «Көшпенділер әлемі» этноауылының ашылуы өтті. Қала тұрғындары мен қонақтары Қазақстан халқының бай мұрасымен, көшпелі халықтардың өзіндік мәдениетімен таныса алады.
Этноауыл бірнеше орынға бөлінген: Орталық алаң, ұлттық ойындарға арналған балалар ойын алаңы, халық музыкасына арналған шатыр, ашық аспан астындағы көшпелі өркениеттер мұражайы, спорттық іс-шаралар, ұлттық тағамдар, басты сахна, аймақтардың этникалық қоныстары, қолөнершілері және шығыс базары бар арнайы қала, – деп қосты ведомство.
Этноауыл аумағында көптеген кәдесый табуға болатын шығыс базары ұйымдастырылған. Еліміздің екі жүзден астам қолөнершісі өз өнімдерін ұсынады. Этноауыл 7-13 қыркүйек аралығында сағат 11.00-ден 21.00-ге дейін жұмыс істейді.
Елорда тұрғындары, қонақтар мен ойын қатысушылары үшін этноауылдың барлық мәдени іс-шарасына кіру тегін. Күн сайын сағат 12.00-ден 16.00-ге дейін «Өнер ордасы» басты сахнасында Қазақстанның түрлі өңірінен үздік музыкалық ұжымдар өнер көрсетеді.
«Шаңырақ» этношатырында күн сайын айтыстан музыкалық-поэтикалық жекпе-жек кезеңдері өтіп жатыр. Мұнда әртүрлі өңірден келген еліміздің айтыскерлері сөз жарыстырады. Этноауылдың «Көшпенділер әлемі» бағдарламасы әртүрлі мәдени бағдарламасымен қызықты, – делінген ақпаратта.
Сонымен қатар 2024 жылғы 6-14 қыркүйек аралығында «Қазақ елі» монументі, «Ататүрік» паркі, «Бәйтерек» монументі және Орталық саябақ аумағында тағы 4 этноауыл ашылды. Этноауылдар аумағында концерттік бағдарламалар мен спорттық іс-шаралар ұйымдастырылды.
Концерттік бағдарламаға мәдениет басқармасының ведомстволық бағынысты мекемелерінің шығармашылық ұжымдары мен солистері, сондай-ақ белгілі өнер қайраткерлері және отандық эстрада жұлдыздары қатысады. Концерттер этноауылда сағат 18:00-ден 20:00-ге дейін өтеді.
Астана тұрғындары, қонақтар мен ойын қатысушылары үшін барлық этноауылға кіру тегін. Билеттер бойынша 5-ші Дүниежүзілік көшпенділер ойындарының спорттық жарыстарына кіру тегін.