Басты бет Жаңалықтар Көлік министрлігі жүргізушілердің демалыс режимін сақтауын бір ай бойы бақылайды

Көлік министрлігі жүргізушілердің демалыс режимін сақтауын бір ай бойы бақылайды

Динара Амантай

Қағиданы сақтамағандарға айыппұл салынады

Көлік министрлігі 9 қыркүйегінен 9 қазан аралығында автобустар мен жүк көліктері жүргізушілерінің еңбек және демалыс режимін сақтауын қадағалауға бағытталған «Тахограф» акциясын өткізеді, деп хабарлайды Halyq Uni.

Акцияның мақсаты – жолаушыларды немесе жүктерді автомобильмен тасымалдауды іске асыру кезінде жүргізушілердің еңбек және демалыс режимінің сақталуын бақылауды күшейту.

Тахографтармен жабдықтауға автобустар, жүк көліктері, оның ішінде:

  • қауіпті жүктерді автомобильмен тасымалдауды;
  • жолаушыларды, багажды және жүктерді автомобильмен халықаралық тасымалдауды;
  • жолаушыларды және багажды автомобильмен облысаралық, қалааралық тұрақты тасымалдауды;
  • жолаушыларды және багажды автомобильмен облысаралық, қалааралық, ауданаралық тұрақты емес тасымалдауды жүзеге асыру кезінде пайдаланылатын көліктер жатады.

Көлікті басқарудың күнделікті ұзақтығы қолданыстағы қағидаға сәйкес 9 сағаттан аспау керек. Төрт жарым сағат бойы үздіксіз басқарғаннан кейін, жүргізуші кемінде 45 минут үзіліс жасауға тиіс, – делінген министрлік хабарламасында.

Қағида талаптары сақталмаған жағдайда «Әкімшілік құқықбұзушылық туралы» ҚР Кодексінің 572-бабымен тасымалдаушыларға 10 АЕК-тен 50 АЕК (36 920-184 600 тг) аралығында, жүргізушілерге 10 АЕК (36 920 тг) көлемінде әкімшілік айыппұл көзделген..