Олар Қазақстан теңге сарайында дайындалды
Ұлттық банк «Есте қалатын оқиғалар мен біртуар адамдар» монеталар сериясынан RAQYMJAN QOSHQARBAEV. 100 JYL және KEMEL AQYSHEV. 100 JYL коллекциялық монеталарын айналысқа шығарады, деп хабарлайды Halyq Uni.
Монеталар 28 тамыздан бастап банктің kazcoins.nationalbank.kz интернет-дүкені арқылы сатылады.
RAQYMJAN QOSHQARBAEV. 100 JYL коллекциялық монеталары
2024 жылы Қазақстанның Халық қаһарманы, Ұлы Отан соғысының батыры – Рахымжан Қошқарбаевтың туғанына 100 жыл толады. Батыр 1945 жылы 30 сәуірде Берлинді алу кезінде Рейхстагқа қызыл ту тіккен Қызыл Армияның алғашқы сарбаздарының бірі болды.
Монеталар мельхиор қоспасынан (МН 25) жасалды, массасы – 15 грамм, диаметрі – 33 миллиметр, дайындау сапасы – brilliant uncirculated, номиналы – 200 теңгелік, таралымы – 5 мың дана.
KEMEL AQYSHEV. 100 JYL коллекциялық монеталары
2024 жылы көрнекті археолог және ғалым Кемел Ақышевтың туғанына 100 жыл толды. Оның басшылық етуімен Алматы қаласы маңындағы Есік қорғанына археологиялық қазба жұмыстарын жүргізу барысында «Алтын адам» табылды.
Монеталар мельхиор қоспасынан (МН 25) жасалды. Монета массасы – 15 грамм, диаметрі – 33 мм, дайындау сапасы – brilliant uncirculated, номиналы – 200 теңгелік, таралымы – 5 мың дана.
Коллекциялық монеталар Қазақстан Республикасының бүкіл аумағында өздерінің белгіленген құнына сай төлемнің барлық түрі бойынша қабылдануға, сондай-ақ елдің барлық банкінде банк шоттарына есепке алынуға, аударуға, ұсақталуға және айырбасталуға жатады, – делінген банк хабарламасында.
Коллекциялық монеталар Қазақстан теңге сарайында дайындалды.
