Әртүрлі конфессиялардағы киім элементтерін енгізуге жол берілмейді
Қазақстан Республикасы Білім және ғылым министрлігі «Орта білім беру ұйымдары үшін міндетті мектеп формасына қойылатын талаптарды бекіту туралы» бұйрығына өзгертулер әзірледі.
Талаптар бойынша мектеп формасы білім берудің зайырлы сипатына сай болуы керек. Мектеп формасының үлгісі, түсі классикалық стильде, бірыңғай түс гаммасында жасалады, үш түстен асырмай араластыруға рұқсат беріледі. Мектеп формасының түсі қалыпты және ашық емес түстерден таңдалады.
Мектеп формасы күнделікті, киім-кешек және спорттық болып бөлінеді. Мектеп формасына әртүрлі конфессиялардағы киім элементтерін енгізуге жол берілмейді.
Ұсынылған түзетулерде қыздарға арналған мектеп формасына мыналар кіреді: пиджак, жилет, юбка, шалбар, түймелері немесе бекіткіші бар трикотаж кардиган (бомбер), классикалық жейде (қысқы кезең: трикотаж жилет, сарафан, водолазка). Қыздарға арналған шалбарлар еркін тігілген және ұзындығы бойынша тобықты жауып тұрады.
Мектеп формасына орта білім беру ұйымының ерекшелік белгілерін (белгілер, тігіспелер, шеврон және т.б.) орналастыруға рұқсат етіледі.
Мектеп формасының түсін, фасонын таңдауды және юбканың ұзындығын орта білім беру ұйымы мен кеңес (мектеп кеңесі, қамқоршылық кеңес, ата-аналар кеңесі) айқындайды, жалпымектептік ата-аналар жиналысының хаттамасымен бекітіледі.
Сонымен бірге жеке мектеп формасын өндірушілердің артықшылығына жол берілмейді. Ата-аналар өндірушіні таңдауда және мектеп формасын сатып алуда тәуелсіз. Бұл ретте облыстың, республикалық маңызы бар қаланың, астананың, ауданның (облыстық маңызы бар қаланың) білім беру органдары ата-аналарға және білім беру ұйымдарына әкімшілік-аумақтық бірлік үшін мектеп формасының бірыңғай түсін таңдауды ұсынады.
Мектеп басшысы мектеп формасының сақталуы туралы мәселені кеңеске (мектеп кеңесі, қамқоршылық кеңесі, ата-аналар комитеті) қояды.
Құжат 22 маусымға дейін қоғамдық талқылау үшін НҚА сайтында орналастырылған.