Құны 15 млн доллар болатын аса ірі есірткі партиясын шекарадан өткізбек болған шетелдіктер ұсталды, деп хабарлайды Halyq Uni.

ҰҚК Шекара қызметінің мәліметінше, 31 мамырда Түркістан облысындағы Б.Қонысбаев атындағы бақылау-өткізу пунктінде шекарашылар қызметтік иттің көмегімен ауыр жүк көлігінде аяқ киім креміне арналған ыдыстарға жасырылған күдікті есірткіні тауып, тәркілеген.

Сараптама нәтижесінде алынған заттардың құрамында героин бары анықталды. Оның жалпы салмағы – 775 келі. Табылған есірткінің «қара» нарықтағы құны 15 млн АҚШ долларынан асып түседі.

Осы қылмысты жасады деген күдікпен екі шетел азаматы ұсталып, сот санкциясымен қамауға алынды.

Сотқа дейінгі тергеп-тексеру жүргізіліп жатыр.