Microsoft жүйесіндегі ақау елдегі инфрақұрылымдар мен IT-сервистерге әсер етпеді – министрлік
![](https://halyq-uni.kz/cache/imagine/1200/uploads/news/2024/07/19/669a3ef4e9c0d748269163.jpeg)
Цифрлық даму, инновациялар және аэроғарыш өнеркәсібі министрлігі Microsoft жүйесіндегі ақау елдегі инфрақұрылымдар мен IT-сервистерге әсер етпегенін мәлімдеді, деп хабарлайды Halyq Uni.
Қазір елдің маңызды инфрақұрылымдары мен мемлекеттік IT-сервистерінің жұмысында ешқандай ақаулар тіркелмеген. Шағымдар түскен жоқ, барлық жүйелер қалыпты режимде жұмыс істеуде. Цифрлық даму министрлігі жағдайды бақылауда ұстап отыр, – делінген министрлік хабарламасында.
Айта кетсек, Microsoft Azure сақтау платформасының істен шығуы американдық авиакомпаниялардың 200-ден астам рейсінің кешігуіне және 130-дан аса рейстің тоқтатылуына себеп болған.
CNN телеарнасының мәліметінше, 18 шілдеде Microsoft корпорациясы Azure платформасының АҚШ-тың орталық бөлігінде жұмысын тоқтатқанын хабарлаған. Корпорация келеңсіз оқиғаның себебін анықтағанын және мәселені шешу үшін жұмыс істеп жатқанын атап өтті.