Бурабай әкімдігі ауданда не себепті әскерилер жүргенін түсіндірді
Әкімдік тұрғындарды жалған ақпарат таратпауға шақырды
![](https://halyq-uni.kz/cache/imagine/1200/uploads/news/2024/07/12/6690c37c871a5861173179.jpeg)
Бурабай ауданының әкімдігіні тұрғындарға үндеу жасап, жалған ақпаратқа сенбеуге шақырды, деп хабарлайды Halyq Uni.
Әкімдік Қазақстанның Қарулы Күштерінің жұмылдыру және жауынгерлік даярлығының 2024 жылға арналған негізгі іс-шараларының жоспар-күнтізбесін орындау үшін 5-14 шілде аралығында өңірде тактикалық-арнайы оқу-жаттығу өткізу жоспарланғанын хабарлады. Жаттығу барысында Ақмола облысының аумақтық қорғаныс бригадасына тіркелген әскери міндеттілерді оқу-жаттығу әскери жиындарына шақыру жүргізу жөніндегі іс-шаралар көзделген.
Ағымдағы жылдың 12 шілдесінде Бурабай кентінің маңында тактикалық-арнайы оқу-жаттығу өткізу шеңберінде жеке құрам бос оқтар мен имитациялық жарылыстарды қолдана отырып, практикалық оқу-жауынгерлік міндеттерді орындайтын болады. Бөлімшенің белгіленген мерзімде мақсаты бойынша міндеттерді орындау қабілеті мен үйлесімділігі, әскери қызметшілердің оқуы, сондай-ақ командирлердің бағынысты және берілген бөлімшелерді басқару дағдылары бағаланатын болады, – деді әкімдікте.
Сондай-ақ аталған іс-шара жабық түрде өткізілетінін ескертті. Осыған байланысты тұрғындардан әлеуметтік желілерді пайдаланушылардан әскери қызметшілердің қозғалысы туралы жалған хабарламалар мен бейнематериалдарды таратпауды және тек ресми дереккөздерге сенуді сұрады.