Астанада Wildberries компаниясының логистикалық тарату орталығы салынады
Бұл компанияның Ресей Федерациясынан тыс жердегі алғашқы ірі жобасы
![](https://halyq-uni.kz/cache/imagine/1200/uploads/news/2024/07/11/668f9c8413789882735242.jpg)
Елордада Wildberries халықаралық компаниясының жаңа логистикалық тарату орталығы салынады. Еліміздегі алғашқы орталық қазір Алматыда салынып жатыр, деп хабарлайды Halyq Uni.
Бұл туралы бүгін ҚР Премьер-министрі Олжас Бектеновтің Алматының индустриялық аймағындағы кәсіпорындарды аралауы кезінде айтылды.
Премьер-Министрге ауданы 100 мың шаршы метрден асатын Wildberries жаңа логистикалық тарату орталығының құрылысы туралы баяндалды. Бұл біздің елімізде жүзеге асырылып жатқан осындай екі жобаның бірі: екінші орталық Астанада салынады. Қазіргі кезеңде жобаға 12,9 млрд теңге инвестиция құйылған. Құрылыс жұмыстарын 2025 жылдың ІІ тоқсанында аяқтау жоспарланған, - делінген ақпаратта.
Сондай-ақ бұл орталықта 4 мың жұмыс орнын құру көзделген. Логистикалық тарату орталығын іске қосу кәсіпкерлердің логистикаға шығындарын қысқартуға, тауар ассортиментін кеңейтуге және сатуды ұлғайтуға мүмкіндік береді деп жоспарланып отыр.
Айта кетейік, бұл – Wildberries-тің Ресей Федерациясынан тыс жердегі алғашқы ірі жобасы.