Иран Қазақстанға суды үнемдеуге көмектеседі
Тараптар гидротехникалық нысандардың құрылысын талқылады
![](https://halyq-uni.kz/cache/imagine/1200/uploads/news/2024/07/04/66864785ad54d049398065.jpg)
Иран суармалы суды тасымалдаудың заманауи технологияларын ұсынуға дайын. Бұл туралы Су ресурстары және ирригация министрі Нұржан Нұржігітов пен Иранның Энергетика министрі Әли Акбар Мехрабианмен кездесу барысында айтылды, деп хабарлады Halyq Uni тілшісі.
Әли Акбар Мехрабиан ирандық компаниялар Орталық Азияда, атап айтқанда Қазақстанда әлемдегі ең ірі бөгеттердің бірі саналатын – «Бахтиари» ГЭС-ке ұқсас ауқымды жобаларды іске асыруға ниетті екенін айтты. Сондай-ақ, министр Иран суармалы суды тасымалдаудың заманауи технологияларын ұсынуға дайын екенін және бұл булану себебінен болатын шығындарды едәуір азайтуға мүмкіндік беретінін мәлімдеді.
Нұржан Нұржігітов өз кезегінде мұндай жобалар Қазақстанның оңтүстік өңірлері – Жамбыл, Қызылорда және Түркістан облыстары үшін қажет екенін атап өтті. Сондай-ақ, Су ресурстары және ирригация министрі ирандық компанияларды келіссөздер жүргізу үшін Қазақстанға шақырды.
Биылғы су тасқыны еріген қар суын қауіпсіз өткізу және одан әрі тиімді пайдалану үшін жаңа су қоймалары қажет екенін көрсетті. Ирандық компаниялар өте табысты жобаларды жүзеге асырып жатыр. Олардың жұмысының тиімділігін көргендіктен ирандық әріптестерімізбен тығыз және ұзақ мерзімді ынтымақтастыққа дайынбыз, – деді Нұржан Нұржігітов.