Әлеуметтік маңызы бар азық-түлік арзандады
Баға Маңғыстау мен Павлодар облысында айтарлықтай төмендеген
![](https://halyq-uni.kz/cache/imagine/1200/uploads/news/2024/07/02/6683d2364e429719484414.jpeg)
Елімізде жартыжылдық қорытындысы бойынша әлеуметтік маңызы бар азық-түлік бағасының төмендеуі тіркелді, деп хабарлады Halyq Uni тілшісі.
Кеше вице-премьер Серік Жұманғариннің төрағалығымен өткен кеңесте әлеуметтік маңызы бар азық-түлік тауарларының бағасына қатысты жағдайдың қорытындысы талқыланып, күзгі және көктемгі тұрақтандыру қорларында көкөніс қорларын қалыптастыру барысы талқыланды.
Жартыжылдық қорытындысы бойынша, әлеуметтік маңызы бар азық-түлік тауарлары бағасының тұрақты дефляциясы байқалады: маусымда орташа баға индексі 0,3%-ға төмендеді, ал жыл басынан бері жалпы 0,2%-ға төмендеген. Бағаның төмендеу үрдісі жалғасып жатыр.
Сауда және интеграция бірінші вице-министрі Айжан Бижанованың айтуынша, соңғы аптада бағалар орташа тағы 0,1%-ға төмендеді. Әсіресе, 9 тауар бойынша: сәбіз (1,5%), қарақұмық жармасы (0,8%), ұн (0,7%), сүт (0,5%), тауық еті (0,2%), күріш, сиыр еті, тұз және қант (0,1%). Бағаның төмендеуі 10 облыста байқалады. Айтарлықтай төмендеу Маңғыстау облысында (0,4%) және Павлодар облысында (0,3%) байқалды.
Ауыл шаруашылығы вице-министрі Ербол Тасжүреков өңірлердегі ерте пісетін өнімдерге келісімшарт жасау барысын баяндады. Қазір әкімдіктер маусым-шілдеге ерте пісетін көкөністерге 37 мың тонна көлемінде форвардтық келісімшарттар жасасты. Вице-министр 1 тамызға дейін өңірлер күзгі өнімді форвардтық сатып алу аясында ауыл шаруашылығы өндірушілерін қаржыландыру қажеттігін, фермерлердің жеңілдетілген қаражатты уақтылы алуын қамтамасыз ету керек екенін атап өтті.