Шымкент қаласының ресми және іскерлік делегациясының сапары аясында Қытайдың Сиань қаласында Бас консулдықтың қолдауымен бауырлас қалалалардың кәсіпкерлерінің қатысуымен сауда-экономикалық форум өтті, деп хабарлады Halyq Uni тілшісі.

Сондай-ақ Шымкенттің 20-ға жуық компаниясы мен Қытайдың 30-дан астам кәсіпорын өкілдері арасында B2B-кездесулер өтті. Шымкент бизнес-делегациясының құрамына денсаулық сақтау, IT, электр жабдықтарын өндіру, құрылыс материалдары, металлургия, тамақ және ауыл шаруашылығы өнімдерін өндіру, білім беру, қоғамдық тамақтану және тағы басқа саладағы бизнес өкілдері қатысып жатыр.

Қала әкімі Ғабит Сыздықбеков қатысушыларды құттықтап, екі елдің экономикалық ынтымақтастығы мен іскерлік серіктестігінің оң динамикалық өсуін атап өтті.

Бүгінгі кездесулер сындарлы ынтымақтастыққа ықпал етіп, екіжақты жаңа жобаларды іске асыру перспективаларына жол ашатынына сенімдімін. Сиань – «Бір белдеу – бір жол» бастамасының Жібек жолы экономикалық белдеуінің маңызды нүктесі. Өткен жылғы сапар аясында Қазақстан пҚасым-Жомарт Тоқаев пен ҚХР төрағасы Си Цзиньпин Шымкент пен Сиань арасында бауырластық байланыс орнату туралы келісімдер бойынша бірқатар құжатқа қол қойды. Бұл шаралар екі қала арасындағы сауда-экономикалық қатынастарды жандандыратыны сөзсіз, – деді Ғабит Сыздықбеков.

Сондай – ақ ол Шымкент халық саны бойынша Қазақстанның үшінші ірі қаласы және алып жатқан ауданы бойынша бірінші қала екенін атап өтті. Қала Орталық Азия және Таяу Шығыс елдерімен белгіленген экономикалық байланыстары бар шекара маңы аймағы мәртебесіне ие және елдің маңызды көлік торабы. Мұнда елдің өнеркәсіптік әлеуеті шоғырланған.

Қалада инвесторлар үшін барлық жағдай жасалған. Жалпы ауданы 869 гектар 5 өндірістік алаң жұмыс істейді. Бұдан басқа, металлургия, жеңіл және тамақ өнеркәсібін, мұнай химиясын, логистиканы дамыту мақсатында өңдеу өнеркәсібінде 2 098 гектар аумақта 7 қосымша өндірістік алаң құру бойынша жұмыстар жүргізіліп жатыр, –деді ол.

Ғабит Сыздықбеков қала әкімдігі Шымкент қаласында сауда қатынастарын орнату және инвестициялық жобаларды табысты іске асыру үшін барлық қажетті қолдауды көрсететінін атап өтті.

Сонымен қатар, келіссөздер барысында екі елдің кәсіпкерлері өз компанияларын таныстырды. Қытайлық серіктестер азық-түлік өндірісі, логистика, машина жасау, денсаулық сақтау және медицина салаларындағы ынтымақтастықты дамытуға қызығушылық танытты.

Өз кезегінде шымкенттік кәсіпкерлер металлургия, логистика, целлюлоза-қағаз және тамақ өнеркәсібі, машина жасау салаларында іскерлік әріптестікті арттыру мүмкіндіктерін жеткізді.

Форум мен кездесулердің қорытындысы бойынша B2B форматында меморандумдар мен шарттарға қол қойылды.

Атап айтқанда, «Invest Shymkent» ЖШС мен «China-Kazakhstan Enterprises Alliance Committee group» арасында «KazFerroGroup» ЖШС мен «Shanxi Heynan New Metallurgical Equipment Co.» ЖШС арасында өзара түсіністік туралы меморандумға қол қойылды. «LTP-JT food Expert» ЖШС мен «Xi ' an gang Tong Tian Xia Dian zi Shang Wu You Xian Gong Si» арасында-қоғамдық тамақтану саласында бірлескен кәсіпорын құру туралы, сондай-ақ «KazBioTech» ЖШС мен «Alashankou city Haoyu Trading Co. Ltd» арасында өсімдік майын жеткізуді көздейтін келісімшарт жасалды.