Тараз қаласының Қарасу шағын ауданында жарылыс болды. Жауапты қызмет оның себептерін анықтап жатыр.

22 маусымы сағат 21:50–де «QazaqGaz Aimaq» АҚ Жамбыл өндірістік филиалының жедел-диспетчерлік қызметіне Тараз қаласының «Қарасу» шағын ауданында күшті жарылыс болғаны туралы хабарлама түсті. Зардап шеккендер жоқ, - деп мәлімдеді ведомстводан.

Өңірдегі өндірістік филиал жарылыс орнында газ құбырының өтпей тұрғанын, төтенше оқиға басқа себептермен болғанын және анықталып жатқанын хабарлады.

Газ қызметінің мамандары оқиға орнын газ анализаторымен тексеріп, ауада газ концентрациясы жоқтығына көз жеткізді.

Қазіргі уақытта оқиға орны қоршауға алынды, барлық қалалық қызметтер оқиға орнында жұмыс істеп жатыр, жарылыс себептері анықталуда. Алдын ала болжам бойынша, жерасты жоғары вольтты электр желісінде қысқа тұйықталу орын алған, - дейді ведомствоның қоғаммен байланыс департаментінің директоры Мұхит Ықылас.