Алматы облысында тұрғындар тасжолды жауып тастады (ВИДЕО)
Бұған су өшірілгені себеп болып отыр
![](https://halyq-uni.kz/cache/imagine/1200/uploads/news/2024/06/20/66745bfcb8a1f651534758.jpg)
Алматы облысы Қарасай ауданының үш күн бойы сусыз қалған "Асыл Арман" тұрғын үй кешенінің тұрғындары Алматы-Бішкек тасжолын жауып тастады. Әкімдік өкілдері бұл жайтқа түсінік берді, деп хабарлайды KAZ.NUR.KZ.
Тұрғындар республикалық маңызы бар тасжолды жауып тастағаны туралы ақпарат Instagram-дағы krisp_almaty парақшасында жарияланды.
"Бүгін, 20 маусымда Алматы облысы Қарасай ауданы Іргелі ауылында орналасқан "Асыл Арман" тұрғын үй кешенінің тұрғындары Алматы-Бішкек тасжолын жауып тастады. Бұған су өшірілгені себеп болып отыр. Тұрғындар үш күн бойы сусыз отыр. Суық су да, ыстық су да жоқ.
Жергілікті тұрғындар көптеген апат жағдайы туындаса да, мәселені шешудегі әкімдіктің тиімсіз әрекеттерін алға тартып, наразылығын білдірді. Оқиға орнына Қарасай ауданы әкімінің орынбасары келгенімен, мәселе нақты қашан шешілетінін айтпаған. Оқиғаның жай-жапсары анықталып жатыр", - делінген жазбада.
Бұл жайтқа Қарасай ауданы әкімдігінің өкілдері пікір білдіріп, су не себепті өшірілгенін түсіндірді.
"Іргелі ауылындағы "Асыл Арман" тұрғын үй кешеніндегі сорғы станциясының автоматикасында ақау шықты, бұл 5088-ге жуық пәтердегі судың өшіп қалуына әкеп соқтырды. Оқиға орнында "Алатау Ком Сервис" ЖШС инженерлері жұмыс істеп жатыр. Қайта бағдарламалау жұмыстары жүргізіліп жатыр, содан соң барлық құрылғы қайта іске қосылады", - делінген әкімдік жауабында.