×

Тоқаев: «Сауд Арабиясы – Қазақстанның Ислам әлеміндегі серіктесінің бірі»

Екі елдің барлық саладағы ынтымақтастығы нығаяды

 Дастан Жұмабекұлы 06.06.2022 | 14:43
фото: Ақорда

Мемлекет басшысы Қазақстанға ресми сапармен келген Сауд Арабиясы Корольдігінің Сыртқы істер министрі Фейсал бен Фархан Әл Саудпен кездесті.

Бұл туралы Ақорда хабарлады.

Кездесуде саяси, сауда-экономикалық, инвестициялық және мәдени-гуманитарлық ынтымақтастықты нығайтуға баса мән бере отырып, Қазақстан мен Сауд Арабиясы арасындағы қатынастарды дамытудың перспективалары талқыланды.

Мемлекет басшысы Корольдіктің сыртқы саяси ведомство басшысына ілтипат білдіре отырып, оның бұл сапары еліміздің тарихындағы бетбұрысты сәтпен – жалпыұлттық референдуммен тұспа-тұс келгенін атап өтті.

Қасым-Жомарт Тоқаев Сауд Арабиясы Қазақстанның араб және ислам әлеміндегі басты серіктесінің бірі екенін айтты. 

Елдеріміз ортақ құндылықтарға негізделген саяси диалогты достық пен өзара сенім рухында дәйекті түрде дамыта береді. Екі қасиеттінің Сақтаушысы Король Салман бен Әбдел Әзизбен және Тақ мұрагері Мұхаммед бен Салманмен арадағы табысты ынтымақтастықты одан әрі жалғастыруға дайын екенімізді білдіремін, – деді Президент.

Қасым-Жомарт Тоқаев ауыл шаруашылығы, мұнай химиясы, туризм, тау-кен металлургиясы және қаржы салаларындағы бірлескен жобаларды жүзеге асыру үшін қолайлы инвестициялық мүмкіндіктердің бар екеніне назар аударды.

Бұл ретте, Мемлекет басшысы Қазақстан мен Сауд Арабиясының үкіметаралық комиссиясы мен Іскерлік кеңестің жұмысын жандандыру маңызды екенін атап көрсетті. Сондай-ақ, тиісті келіссөздерді жүргізу үшін өкілетті үкіметтік делегацияны Эр-Риядқа жіберуге дайын екенін айтты.

Бұдан бөлек Мемлекет басшысы Мекке мен Мединеде қазақстандық қажыларға қажетті жағдай жасалатыны және дәстүрлі қонақжайлық көрсетілетіні үшін Корольдіктің басшылығына ризашылығын білдірді.

Фейсал бен Фархан Әл Сауд Сауд Арабиясы Королі мен Тақ мұрагерінің Президент Қасым-Жомарт Тоқаевқа және Қазақстан халқына жолдаған сәлемін жеткізді.

Министр екі мемлекет арасындағы қарым-қатынастардың дәйекті түрде дамып келе жатқанын атап өтті. Сондай-ақ, Корольдік басшылығының дипломатиялық байланыстар орнағаннан бергі жан-жақты ынтымақтастық бағыттағы жетістіктерді жоғары бағалайтынын айтты. 

Саудиялық дипломат Қазақстан Президентін елімізде референдумның табысты өтуімен құттықтады.

Сауд Арабиясы Корольдігі Сіздің басшылығыңызбен Екінші Республиканы құру ісінде және Қазақстанның одан әрі өркендеуіне бағытталған ауқымды реформаларды жүзеге асыруды жалғастыруда табыс тілейді, – деді министр. 

Фейсал бен Фархан Әл Сауд сауда-экономикалық және инвестициялық ықпалдастықты нығайтудың перспективаларын егжей-тегжейлі талқылау үшін қазақстандық серіктестермен кездесу ұйымдастыруға Саудияның тарапы дайын екенін жеткізді. 

Сонымен қатар кездесуде халықаралық күн тәртібінің өзекті мәселелері жөнінде пікір алмасылды.

Кездесудің соңында Қасым-Жомарт Тоқаев Король Салман бен Әбдел Әзизге және Тақ мұрагері Мұхаммед бен Салман Әл Саудқа жүрекжарды сәлемін жолдады.

 

Серіктес жаңалықтары

Сараптама

Денсаулық сақтау министрлігі электронды темекі саудасына толық тыйым салмақ

Сарапшылар оған тосқауыл қоюдың басқа жолын табу қажет деп отыр
03.12.2022 | 09:50

Заманбек Нұрқаділовтің бұрын-сонды еш жерде жарияланбаған видеосы шықты

Бұл видео «Хабар» агенттігінің архивиінде сақталған
03.12.2022 | 07:34

Қарағанды ​​облысында автобус күтіп тұрған оқушының беті үсіп қалған

Абай аудандық білім бөлімі оқиғаны растады
03.12.2022 | 06:30

«Мама, мені күтпеңіз»: Бес баланы қаққан жүргізушінің анасы оқиғаның мән-жайын айтып берді

Мектеп автобусынан түскен бес оқушыны Lexus көлігі қатты жылдамдықпен соққан
03.12.2022 | 00:15