Қазақстанда электронды үкімет порталын пайдаланушылар саны азаюда, деп хабарлайды finprom.kz.

Ұлттық статистика бюросының дерегінше, 2021 жылы eGov.kz қызметін 26,7% үй пайдаланған. Бұл елімізде цифрлық қызметтердің кеңінен енгізілуіне қарамастан соңғы 5 жылдағы ең төмен көрсеткіш болып саналады. Мысалы, 2020 жылғы көрсеткіш – 30,8%, 2019 жылы – 30,4%, 2018 жылы – 34,6%, 2017 жылы – 33,2%.

Электронды үкімет қызметтерінің ең белсенді пайдаланушылары Қарағанды облысында. Онда сұраққа жауап бергендердің 43,1%-ы бұл қызметті пайдалатындарын айтқан, өткен жылғы көрсеткіш – 50,7%. Сондай-ақ үздік үштікке Алматы (пайдаланушылардың 36,4%-ы) және Шығыс Қазақстан (пайдаланушылардың – 35,7%-ы) облыстары енді.

Маңғыстау (пайдаланушылардың 4,7%-ы), Жамбыл облыстары мен Шымкен қаласының тұрғындары eGov.kz қызметін сирек пайдаланады.

Электронды үкімет порталындағы ең танымал қызмет – мемлекеттік басқару органдарының сайты арқылы ақпарат алу. Бұл қызметті респонденттердің 22,3% пайдаланған, өткен жылғы көрсеткіш – 25,3%.