Жамбыл облысының фитосанитариялық бақылау бекетінде Қырғызстаннан Ресейге жіберілген зақымдалған шие өнімі анықталды. Шиенің ішінде дрозофила дернәсілдері болған.

Карантиндік фитосанитариялық бақылау инспекторлары жүргізген тексеру кезінде шиенің дрозофила зиянкестерінің дернәсілдерімен зақымдануының 2 жағдайы анықталған. Залалданған өнімнің жалпы көлемі 39 тоннадан асты.

ҚР ӘҚБтК-нің 400-бабына сәйкес, фитосанитариялық талаптарды бұзғаны үшін әкімшілік айыппұлдар салынды. Сонымен қатар карантинге жатқызылған барлық өнім дереу экспорттаушы елге қайтарылды, – деді Ауыл шаруашылығы министрлігі.

Айта кетсек, дрозофила – кішкентай жеміс шыбындары. Олардың мөлшері шамамен 2-4 миллиметр және салмағы 2 миллиграмм. Олар әдетте қоңыр-сұр түсті болады, ал көздері қызыл. Жұмыртқасы өсімдік тектес субстраттарда дамиды. Олар шіріген көкөніс, жемістермен, ашыған ағаш шырынымен, саңырауқұлақтардың жеміс денелерімен және микрофлораға бай басқа органикалық қалдықтармен қоректенеді.