Ақмола облысында полицейлер, құтқарушылар мен еріктілер хабар-ошарсыз, жұмбақ жағдайда жоғалып кеткен шопанды іздестіріп жатыр. Бұл туралы КТК телеарнасы хабарлады.

Телеарна мәліметінше, 57 жастағы Дәулетбай Кәкеш таяуда ғана шалғайдағы Жарқайың ауданында жұмыс істеп жүрген. Бір апта бұрын ол кенет жоғалып кетті. Ер адамның жұмысқа орналасқанына да көп бола қоймаған.

22 мамырда ферма жұмысшылары шопанды таппай қалған. Алдымен олар шопанды өздері іздеп, төрт күннен кейін шаруашылық басшысы полицияға көмек сұрап хабарласқан. Қазіргі уақытта шамамен 50 адам шопанды іздеп жатыр. Олардың ішінде полиция, төтенше жағдайлар қызметкерлері мен еріктілер бар.

«Арыз алғаннан кейін полиция қызметкерлері ауқымды іздестіру шараларын ұйымдастырып, жедел-іздестіру шараларына арнайы моторлы қайықтар бөлініп, дрон көмегімен әуеден іздестіру жұмыстары жүргізіліп жатыр», - деді облыстық полиция департаментінің жетекші маманы Әлия Біләлова.