Беларусьте еліміздің Әскери өнер академиясы ашылады
Екі ел білім беруде ортақ келісімге келді
![](https://halyq-uni.kz/cache/imagine/1200/uploads/news/2024/05/29/665711600f600254443826.jpeg)
Астанаға Беларусь Республикасы қорғаныс ведомствосының басшысы генерал-лейтенант Виктор Хренин ресми сапармен келді.
Дәстүр бойынша Беларусь елінен келген қонақ «Отан қорғаушылар» монументіне гүл шоқтарын қою рәсіміне қатысты.
Одан кейін Қорғаныс министрлігінде Беларусь мемлекетінен келген әріптесін қорғаныс министрі генерал-полковник Руслан Жақсылықов қарсы алды.
Биыл Беларусь Республикасы Шанхай Ынтымақтастық Ұйымына мүшелікке қабылдау рәсімдерін аяқтады. Осыған байланысты Қазақстанның Қорғаныс министрі Беларусь елінің толыққанды мүше мәртебесін алуы ұйымға сапалы жаңа серпін беретініне сенім білдірді.
Кездесуде генерал-полковник Руслан Жақсылықов пен генерал-лейтенант Виктор Хренин жауынгерлік дайындық, бірлескен оқу-жаттығулар, әскери-спорттық жарыстар өткізу мәселелері туралы әңгімелесіп, әскери ынтымақтастықтың әлеуетті мүмкіндігін талқылады.
Қазақстан Беларусь Республикасымен қарым-қатынасты дамытуға ерекше мән береді. ТМД, ҰҚШҰ және басқа да халықаралық ұйымдар шеңберінде екі ел қорғаныс және қауіпсіздік мәселелерінде өзара белсенді іс-әрекет жасайды.
Қорғаныс саласындағы ынтымақтастықтың бұл түрі Қазақстан мен Беларусь арасындағы сенім мен достық қатынастарды нығайтуға, оған қоса өңірдегі қауіпсіздік пен тұрақтылықты қамтамасыз етуге ықпал етеді, – деді генерал-полковник Р. Жақсылықов.
Кездесуде ынтымақтастықтың негізгі бағыттарының бірі – әскери білім беру мәселесі де қаралды.
Қазіргі кезде Беларусь әскери жоғары оқу орындарында қазақстандық офицерлер мен курсанттар білім алып жүр. Жуырда Беларусь Республикасының Әскери академиясында Қазақстан Республикасының Әскери өнер аудиториясы ашылады.
Қорғаныс министрі генерал-полковник Руслан Жақсылықов әріптесіне Беларусь суворовшылары алғаш рет қатысатын «Айбын» X Халықаралық әскери-патриоттық жастар жиынын өткізу бастамасын қолдағаны үшін алғысын білдірді.
Қорғаныс министрлері екіжақты ынтымақтастық жоспарын іске асырудың жоғары қарқынын атап өтіп, Қазақстан мен Беларусь қарулы күштерінің әскери әуеайлақтарында әскери әуе кемелерін қабылдауды, әуеайлақтық-техникалық қамтамасыз етуді және күзетуді ұйымдастыру туралы келісімге қол қойды.
Сапар аясында Виктор Хренин Қазақстан Республикасының Ұлттық қорғаныс университетінде болды. Онда жоғары оқу орнының оқу-материалдық базасымен танысып, Беларусь әскери өнер аудиториясын аралады.