БҚО-да есепші бюджет қаражатын жымқырғаны үшін сотталды
Ол ұрлаған ақшасын ойынға салып жіберген
![](https://halyq-uni.kz/cache/imagine/1200/uploads/news/2024/05/27/66b0d7931d458396586180.jpeg)
Батыс Қазақстан облысында Қаратөбе аудандық соты мемлекеттік мекеменің қаражатын жымқырған есепшіге үкім шығарды, деп хабарлады Halyq Uni тілшісі.
Соттың үкіміне сәйкес, ол 3 жыл 6 ай мерзімге бас бостандығынан және сол мерзімге бухгалтерлік қызметпен айналысу құқығынан айырылды.
Қаратөбе аудандық прокуратурасы есепшінің мекеме басшысының электрондық цифрлық қолтаңбасын заңсыз қолданып, 7 млн теңгеге жуық қаражатты жымқырғанын анықтады. Осы дерек бойынша аудан прокуратурасы Қылмыстық кодекстің 189-бабының 3-бөлігі 1-тармағымен («Өзіне сеніп тапсырылған мүлікті ірі мөлшерде жымқыру және талан-таражға салу») сотқа дейінгі тергеп-тексеруді бастаған.
Келтірілген шығынның 1 млн астамын ғана қайтарған сотталушы сот процесінде жымқырған қаражатты құмар ойындарға жаратқанын айтты.