Қазақстанда «Жазғы мектеп» басталады
Оқыту икемді кесте бойынша қызықты форматта ұйымдастырылады
![](https://halyq-uni.kz/cache/imagine/1200/uploads/news/2024/05/22/66c4fc3f335fa961667953.jpeg)
27-31 мамыр аралығында су тасқынынан зардап шеккен өңірлердегі және қыс мезгілінде қашықтықтан оқу форматы жүргізілген оқушылар үшін «Жазғы мектеп» басталады, деп хабарлады Halyq Uni тілшісі.
Оқу-ағарту министрлігінің мәліметінше, негізгі мақсат – оқушылардың білімінде жіберілген олқылықтардың орнын толтыру арқылы білім сапасын арттыу.
Су тасқыны болған өңірлердегі 2 622 мектептің оқушылары үшін «Жазғы мектеп» аясында өз уақыттарын пайдалы өткізу мүмкіндігі беріліп отыр. Оқыту икемді кесте бойынша қызықты форматта ұйымдастырылады. Жазғы мектеп су тасқынынан зардап шеккен өңірлерде тұратын, сондай-ақ қыс мезгілінде ауа-райының қолайсыздығына байланысты қашықтықтан оқытудан өткен 832 мың оқушыны қамтиды деп жоспарланып отыр. Оқуға балалардың қызығушылығын тудыру мақсатында мұғалімдер баға қоймайды және үйге тапсырма бермейді, – деді Оқу-ағарту министрлігі орта білім комитетінің төрағасы Қаныбек Жұмашев.
Айта кетсек, «Жазғы мектепке» балалар өз еркімен және ата-аналарының келісімі бойынша қабылданады.