Теннистен Қазақстан құрамасы ширек финалға шықты
Іріктеу турнирінде жартылай финалға шыққан 4 команда әлем чемпионатына барады
![](https://halyq-uni.kz/cache/imagine/1200/uploads/news/2024/05/14/66435d29670b6184157082.jpeg)
Шымкент қаласында 16 жасқа дейінгі жасөспірімдер арасында өтіп жатқан Билли Джин Кинг кубогының Азия-Тынық мұхит аймағы бойынша іріктеу турнирінде Қазақстан құрамасы мерзімінен бұрын ширек финалға шықты.
А тобында Ярослава Шведова жаттықтыратын жасөспірімдер командасы Индонезия құрамасын 3:0 есебімен жеңді.
Алдымен Ева Корышева индонезиялық Наомиді 6:0, 6:0 есебімен жеңсе, Ариана Гогулина Синклерден 6:4, 6:2 есебімен басым түсті.
Жұптық сында Ариана Гогулина Альбина Кәкеновамен бірге командаға үшінші ұпайды әкелді. Олар қарсыластарын 6:0, 6:2 есебімен жеңді.
Енді ертең Қазақстан құрамасы Жапониямен ойнайды. Осы матчта қай команданың А тобынан бірінші орынмен ширек финалға шығатыны белгілі болады.
Жапониялықтар да Қазақстан секілді мерзімінен бұрын ширек финалға жолдама алды.
Іріктеу турнирінде жартылай финалға шыққан 4 команда әлем чемпионатына барады.