Мемлекет басшысы Қасым-Жомарт Тоқаевтың тапсырмасын орындау аясында Үкімет табиғаттағы өртке қарсы іс-қимыл жүйесін нығайту жұмыстарын жалғастырып жатыр. Премьер-министр Олжас Бектенов Орман қорын күзету және қорғау қызметін құру туралы қаулыға қол қойды, деп хабарлады Halyq Uni тілшісі.

Экология және табиғи ресурстар министрлігі жанындағы жаңа Республикалық азаматтық қорғау қызметі ТЖ кезінде, оның ішінде ормандағы өртті сөндіру барысында орман шаруашылығы мекемелерінің тиімділігін арттыруға мүмкіндік береді.

Ормандағы өртке қарсы іс-қимыл ормандарды көбейтуге және ағаштарды кесуге ғылыми тәсілді, сондай-ақ кешенді алдын алу шараларын қабылдау мен тиісті құзыреттерді дамытуды қажет етеді. Бөлек қызмет құру қажеттілігі осындай талаптардан туындап отыр.

Орман қорын күзету және қорғау қызметінің құрылуы мемлекеттік органдардың алапат орман өрттеріне қарсы күрес шараларын үйлестіруін жақсартуға, тиісті мекемелерді техникамен және құрал-жабдықтармен қамтамасыз етуді арттыруға, сондай-ақ табиғи өрттердің алдын алу және оларды сөндіру үшін білікті кадрлар құрамын жасақтауға мүмкіндік береді деп күтіліп отыр.

Айта кетсек, қазір Қазақстанда 15 республикалық азаматтық қорғау қызметі бар. Олар еліміздегі тіршілікті қамтамасыз ететін институттардың тұрақты жұмыс істеуін қамтамасыз етуге арналған. Олардың қатарына өрт сөндіру қызметі, медицина қызметі, химиялық қорғау қызметі, инженерлік қызмет, радиациядан қорғау қызметі, ұлттық гидрометеорологиялық қызмет және тағы басқасы кіреді.